УИХ дахь АН-ын бүлэг өнөөдөр 10:00 цагаас ээлжит бус хуралдаж, шатахууны үнэ, нийлүүлэлтийн талаар АҮЭБ-ийн сайд Г.Дамдиннямын мэдээллийг сонсож, цаг үеийн зарим асуудлыг хэлэлцэв.

-АН-ын дарга О.Цогтгэрэл:

-Эрх баригч нам “Аливаа намын дарга их хурлын дарга байхыг хуулиар хориглоогүй” гээд байгаа. Хуулиар хориглосон бол угаасаа болохгүй ш дээ, энэ чинь. Тийм биз дээ? Хуулиар хориглосон зүйлийг хийгээд сууж байна гэж байхгүй биз дээ?

Хуулиар хориглоогүй учраас болно гэдэг тайлбар чинь зарчимгүй. Хуулиар хориглоогүй ч парламентат ёсны зарчимд нийцэхгүй байгаа зүйлийг засъя л гэж байна. Буруу жишгийг засъя. Буруу уламжлалыг засах нь зүйтэй.

-Энэ шаардлагаа МАН-ын бүлэгт албан ёсоор бичгээр хүргүүлсэн үү?

-Ж.Бат-Эрдэнэ даргыг УИХ-ын индэр дээр хурал удирдаж байхад Х.Тэмүүжин гишүүн бичгээр гардуулж өгсөн. Бичлэг нь байгаа. Та бүхэн бичлэгээ ухраагаад хараарай.

–Н.Учрал УИХ-ын даргын албан тушаалаас огцорвол та бүхэн чуулганы хуралдаа суугаад, ажлаа хийх үү?

-Мэдээж тийм шүү дээ. Бид хэвийн ажиллаж байна. Бүлгийн хурал гэдэг чинь чуулганы нэг хэсэг. Өнөөдөр бид ээлжит бусаар хуралдлаа.

-Хаврын чуулган нээснээс хойш та Н.Учрал даргатай уулзсан уу?

-Үгүй.

-МАН танд ямар нэг санал тавьсан уу?

-Үгүй.

-Шинэ ЗГ байгуулагдвал АН хамтрах уу?

-Олонх болсон нам Үндсэн хуулийн дагуу ЗГ-аа бүрдүүлээд яв гэдэг байр сууриндаа байгаа.

–Таныг Ерөнхийлөгчийн сонгуульд нэр дэвших бэлтгэлээ хийж байна гэсэн мэдээлэл байна?

-Тийм зүйл байхгүй. АН дотооддоо сонгуулиа амжилттай зохион байгууллаа. Бага сага маргаан, гомдол гарсан байхыг үгүйсгэхгүй.

-Парламентын ажил гацсан шалтгааныг МАН танай намтай холбон тайлбарлаж байна. Үүнд та ямар хариу өгөх вэ?

-УИХ-ын ажлыг АН гацаагаагүй. МАН, ХҮН, ИЗНН-ын 80 гишүүнтэй эвсэл, хамтрал яагаад ажлаа хийхгүй байгаа юм бэ? Биднээс биш, тэднээс асуугаач! Та нар харин хаяг андуураад байх шиг байна.