УИХ-ын дэд даргын албан тушаалд МАН-ын бүлэг өчигдөр Ж.Бат-Эрдэнийг албан ёсоор тавьж, ухрах араандаа эргэлт буцалтгүй залгаснаа МАН нотоллоо. Х.Булгантуяа гишүүнд хариуцлага хүлээлгэж, УИХ-ын дэд даргын үүрэгт ажлаас огцруулах тухай тогтоолын төслийг нэгдсэн хуралдаанд оролцсон гишүүдийн 66.7% нь дэмжив. Алдаа гаргасан гишүүндээ УИХ, МАН-ын бүлэг хариуцлага хүлээлгэлээ.

Түүний оронд МАН-ын бүлэг эмэгтэй гишүүн тавьсан бол ардчилалтай, мэдрэмжтэй, урагшлахаа байг гэхэд ухраагүй гэдгээ харуулах байв. Даанч тэгсэнгүй. Албан тушаалын төлөө улс орноо ч худалдаж, хөнтөрч мэдэхээ харуулж яваа МАН-ын эрчүүд УИХ-ын дэд даргын суудлыг булаацалдаад авчхав. Өлөн юм аа. Амбийцтай байж болох ч өлөн байж болохгүй. Ёсзүйгүй, увайгүй байж болохгүй.

УИХ дахь МАН-ын бүлгээс УИХ-ын дэд даргаар Х.Булгантуяаг, УИХ дахь АН-ын бүлгээс УИХ-ын дэд даргаар Б.Пүрэвдоржийг нэр дэвшүүлж, 2024.07.05-нд их хурлын 110 гишүүн 100% дэмжсэн. 2024 оны их хурлын сонгуулиар олонх болсон МАН УИХ-ын даргаар эрэгтэй, дэд даргаар эмэгтэй хүн тавихаар нэр дэвшүүлснийг гишүүд, сонгогчид алга ташин хүлээж авсан юм. Харин одоо МАН-ын бүлэг эмэгтэй даргыг эрэгтэй хүнээр сольсон нь ухралт болов.

Албан тушаалын төлөө улс орноо ч хөнтөрч мэдэхээ харуулж яваа МАН-ын эрчүүд УИХ-ын дэд даргын суудлыг булаацалдаад авчхав

Шинэ зуунд эмэгтэйчүүдийн нийгмийн оролцоо, тэр дундаа шийдвэр гаргах түвшний оролцоо нэн чухалт тооцогдож, Дэлхий нийтийн хандлага болж байна. Энэ чиг хандлагыг харгалзан, Монгол Улсын Их Хурлын сонгуулийн тухай хуульд өөрчлөлт оруулан, сонгуулийн холимог тогтолцоог сонгож, нам, эвслээс сонгуульд нийт жагсаалтаар нэр дэвшигчдийн 30 хувиас доошгүй нь, тойрогт нэр дэвшигчдийн 50% нь эмэгтэйчүүд байхаар хуульчилсан.

Үр дүнд 2024 оны УИХ-ын сонгуульд нэр дэвшсэн 1341 хүний 38.7% буюу 520 нь эмэгтэйчүүд байв. Энэ бол манай парламентад түүхэн дээд үзүүлэлт болсон юм. 32 эмэгтэй УИХ-ын гишүүнээр сонгогдож, парламент дахь эмэгтэйчүүдийн төлөөлөл 25.4% болсон нь ч дээд амжилт. Ази тивдээ парламент дахь эмэгтэй гишүүдийн тоогоор Монгол Улс 2024 оноос тэргүүлж эхэлсэн.

Өнгөрсөн сонгуулиар нам, эвслүүд сонгуульд нэр дэвшигчдээ, жагсаалтынхаа нэр дэвшигчдийг эрэгтэй, эмэгтэй хэмээн хүйсээр нь сөөлжлөн бичсэн. Энэ нь дэвшил байлаа.

Нөгөөдөр эхлэх их хурлаараа МАН улам эрчтэй ухарна. Өндрөөс уруудахдаа ухарч унана гэдэг ч дээ

УИХ-ын сонгуульд нам, эвслээс нэр дэвшигч эмэгтэйчүүдийн квот 2024 онд 30% байв. Үүнийг 2028 оны сонгуулиар 40% болгохоор зорьж байгаа гэх. Энэ янзаараа бол энэ нь ч худлаа бололтой.

УИХ-ын 2024-2028 оны стратеги төлөвлөгөөнд жендэрийн эрх тэгш байдлыг хангах, эмэгтэйчүүдийн улс төр, нийгмийн оролцоог нэмэгдүүлэх зорилт тусгасан. Эмэгтэйчүүдийн төлөөллийг улс төрд бодитойгоор нэмэгдүүлэх нь зөвхөн жендэрийн тэгш эрхийн асуудал биш. Ард нийтийн амьдралын чанарыг сайжруулахад эмэгтэйчүүд илүү санаа тавьдаг. Дан эрчүүд удирдаж, бий болгосон улс орноо өөрсдөө хар л даа. Эмч, багшийн цалин хэд байдгийг, тэд яаж мачийдгийг эрчүүд мэдэхгүй л байна шүү дээ.

МАН парламентын эмэгтэй дэд даргын албан тушаалыг эрэгтэй гишүүнд өгсөн нь амжилтаасаа ухарсан, дэвшлээсээ татгалзсан явдал болж байна. Машинаар бол МАН ер нь ухрах араандаа хийчихжээ. Нөгөөдөр эхлэх их хурлаараа энэ нам улам эрчтэй ухарна. Өндрөөс уруудахдаа ухарч унана гэдэг ч дээ. Аймшигтай.