Нийслэлийн Прокурорын газар нийтийн албанд ажиллаж байхдаа хэрэг хийсэн 3 хүнд холбогдох хэрэгт яллах дүгнэлт үйлдэж, шүүхэд шилжүүллээ. Үүнд:

– О.П нийтийн албан тушаалтнаар ажиллаж байхдаа хуурамч бичиг баримт бүрдүүлэн, бусдад цалин, урамшуулал, ээлжийн амралтын мөнгө олгосон байна. Мөн байгууллагадаа засвар хийлгэхээр тендер зарлаж, төлбөрийг нь нэр бүхий компани луу шилжүүлсэн хэрнээ засварын ажлыг албан хаагчдаар хийлгэжээ. Эдгээр хэрэгт Эрүүгийн хуулийн 22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/-д зааснаар яллах дүгнэлт үйлдэж, Дүүргийн эрүү, иргэний хялбар ажиллагааны анхан шатны тойргийн шүүхэд шилжүүлэв.

– Б.А нийтийн албан тушаалтнаар ажиллаж байхдаа бусдад илүү цалин олгожээ. Мөн гэр бүлийнхээ хамаарал бүхий хүнийг сонгон шалгаруулалтгүй, хөдөлмөрийн гэрээ байгуулахгүйгээр ажилд томилсон байна. Тэр бусдаас үнэ бүхий зүйл авч, өөртөө болон бусдад эдийн засгийн давуу байдал бий болгосон хэрэгт бас холбогдсон аж. Түүний хэрэгт Эрүүгийн хуулийн 22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/-д зааснаар яллах дүгнэлт үйлдэж, Дүүргийн эрүү, иргэний хялбар ажиллагааны анхан шатны тойргийн шүүхэд шилжүүлсэн байна.

– Х.Н нийтийн албан тушаалтнаар ажиллаж байхдаа улс хоорондын ачаа тээврийн чиглэлээр үйл ажиллагаа явуулдаг нэр бүхий компаниудын захирлаас хахууль авч, өөртөө болон бусдад эдийн засгийн давуу байдал бий болгосон хэрэгт Эрүүгийн хуулийн 22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/-д зааснаар яллах дүгнэлт үйлдэж Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд шилжүүллээ.