Богдхаант Монгол Улс гадаадын сургуульд иргэдээ сургахаар шийдвэрлэж, 1913-1916 онд Хаант Орос улсад анх 9 сурагч илгээжээ. Тэдний 1 нь Мандалын Бат-Очир. Тэр Монголд шуудангийн анхны маркийг санаачлан бий болгосон түүхтэй. Түүний мэндэлсний 130 жилийн ойд зориулсан эрдэм шинжилгээний хурал өнөөдөр Үндэсний номын сангийн шинэ байранд болж байна.
М.Бат-Очир 1895 онд Амгаланбаатар хотод (Их шавь, Хэрлэн отог, Сэрээтэрийн арван) төржээ. Тэрбээр Олноо Өргөгдсөн Монгол Улсын үед Нийслэлхүрээн дэх Оросын консулын газрын дэргэд эрдэмтэн Ж.Цэвээний байгуулан удирдаж байсан орос бага сургуульд суралцаж, улмаар 1913 оны 5 дугаар сараас Хаант Орос улсын Эрхүү хотод А.М.Кладищевийн нэрэмжит дунд сургуульд суралцсан анхны 5 сурагчийн 1. 1916 оны 5 дугаар сард 147 тоот үнэмлэхтэй төгсжээ.
1916-1918 онд Эрхүү хотын Цахилгаан мэдээний сургуульд суралцаж, II зэргийн нэвтрүүлэгч болж, эх орондоо ирсний дараа 1918-1921 онд Хиагт, Нийслэлхүрээ, Замын-Үүдийн Цахилгаан мэдээний хороонд нэвтрүүлэгчээр ажиллаж байв.
Ардын засаг мандсаны дараа тэрээр 1921-1923 онд Цахилгаан мэдээ, шуудан бичгийн ерөнхий хорооны даргын алба хашжээ. Цахилгаан холбооны боловсон хүчин бэлтгэх анхны күрсийг М.Бат-Очироор удирдуулан 15 хүнтэй байгуулж, 1921 оны 10 дугаар сараас хичээллүүлсэн нь үндэсний холбоочдыг бэлтгэх суурь болсон байдаг. Ардын засгийн газар 1922 оны 4 дүгээр сарын 28-нд 18 дугаар тогтоолоор Цахилгаан мэдээний күрсийг Холбооны сургууль болгон өөрчилж, анхны захирлаар нь Цахилгаан мэдээ, шуудан бичгийн ерөнхий хорооны дарга М.Бат-Очир хавсран ажиллажээ.
Тэрбээр манай улсын харилцаа холбооны салбарт ажиллахдаа шинэ тулгар тогтсон засаг төр, ард түмнийг харилцаа холбоогоор үйлчлэх, хязгаар нутгийг холбоожуулах, холбооны боловсон хүчнийг бэлтгэх, өртөө шуудангийн албыг зохион байгуулж хөгжүүлэхэд онцгой анхаарч байсны зэрэгцээ шуудангийн анхны марк гаргахыг санаачилжээ. Ардын Засгийн газрын 1923 оны 11 дүгээр сарын 23-ны өдрийн 44 дүгээр тогтоолоор анхны марк хэвлүүлэн гүйлгээнд оруулах шийдвэр гарсан түүхтэй.
Ардын засгийн газрын тэргүүлэгчдийн 1923 оны 12 дугаар сарын 25-ны өдрийн 55 дугаар хурлын тогтоолоор түүнийг Сангийн яамны төлөөлөгч болгон Монголбанкны Ерөнхий хорооны гишүүнээр шилжүүлэн ажиллуулсан байна. М.Бат-Очир Монголбанкны анхны 4 ажилтны 1 төдийгүй 1925 онд гүйлгээнд нэвтэрсэн манай улсын анхны мөнгөн тэмдэгт-төгрөгийн тавь, зуутын дэвсгэрт дээр алдар нэрээ мөнхлөн үлдээсэн хүн билээ. 1923-1926 онд Монголбанкны Ерөнхий хорооны гишүүн, 1926-1938 онд “Монгол тээх”-ийн Ерөнхий хорооны дарга, хэлтэс эрхэлсэн түшмэл, II авто баазын дарга зэрэг алба хашиж явжээ.
Түүний гавьяа зүтгэлийг төр, засаг өндрөөр үнэлж БНМАУ-ын Бага Хурлын Тэргүүлэгчид ба Ардын Сайд нарын Зөвлөлийн Тэргүүлэгчдийн хамтарсан хурлын тогтоолоор Ардын хувьсгалын 15 жилийн ойг тохиолдуулан Аж үйлдвэрийн гавьяаны одонгоор шагнажээ.
Улс гэрээ төвхнүүлэх үйлсэд хоёргүй сэтгэлээр хүчин зүтгэж явсан түүнийг хувьсгалын эсэргүү хилс хэрэгт холбогдуулан 1938 оны 2 дугаар сарын 8-ны өдөр дайчлан баривчилжээ. Хатуу ширүүн байцаасны эцэст мөн оны 4 дүгээр сарын 15-ны өдөр Онц бүрэн эрхт комиссын хурлын 14 дүгээр тогтоолоор шүүх цаазны бичгийн 43, 44, 45 дугаар зүйлээр дээд хэмжээ өгч мөн өдрөө цаазалжээ. М.Бат-Очирыг Улсын дээд шүүхийн Бүгд хурлын 1966 оны 5 дугаар сарын 20-ны өдрийн 07 тоот тогтоолоор цагаатгасан юм.
Монгол маркийн 80 жилийн ойд зориулан, 2004 онд гүйлгээнд гаргасан дурсгалын блок дээр анх М.Бат-Очирын хөргийг залсан бол Монгол маркийн 100 жилийн ойд зориулан, 2024 онд гүйлгээнд гаргасан цуврал маркийн блок 22к алтан ялтсан дээр мөн түүний хөргийг дүрсэлсэн байна.