Ерөнхий сайд Г.Занданшатарыг огцруулахдаа УИХ саналын буруу томьёолол ашиглан, Үндсэн хууль зөрчсөнийг ҮХЦ тогтоосон. Уг саналын томьёоллыг УИХ-ын Тамгын газар боловсруулж, их хурлын дэд дарга Х.Булгантуяад өгсөн байдаг. Үүнтэй холбоотойгоор УИХ-ын ерөнхий нарийн бичгийн дарга Б.Баасандоржид хариуцлага тооцох асуудал сөхөгдсөн ч парламент даргагүй болсон тул шийдэж чадаагүй. Тэгвэл УИХ-ын шинэ дарга Н.Учрал ерөнхий нарийн бичгийн даргаараа ҮХЦ-ийн гишүүн, Гавьяат хуульч Л.Өлзийсайханыг ажиллуулахаар санал тавьж, Л.Өлзийсайхан уг саналыг хүлээж авлаа.

Тиймээс өчигдрийн чуулганы нэгдсэн хуралдаанаар Л.Өлзийсайханыг ҮХЦ-ийн гишүүний үүрэгт ажлаас чөлөөлж, УИХ-ын ерөнхий нарийн бичгийн даргаар томиллоо. Тэр 2019-2023 онд УИХ-ын ерөнхий нарийн бичгийн даргаар ажиллаж байсан туршлагатай.

Г.Занданшатар 2019 онд УИХ-ын дарга болоод Л.Өлзийсайханыг ерөнхий нарийн бичгийн даргаараа авчээ. 2023.11.16-нд түүнийг ҮХЦ-ийн гишүүнээр томилуулах саналаа УИХ-д танилцуулж, 96 дугаар тогтоолоор ҮХЦ-ийн гишүүнээр томилуулсан юм.

Г.Занданшатар МАН-ын даргын тамгыг атгаж, Ерөнхийлөгчийн сонгуульд нэр дэвших замаа өөрийн гараар засах эрхээ авч чадаагүй. Н.Учрал өнөөдөр түүн рүү харж инээсэн ч Д.Амарбаясгалан шиг араас нь чулуу шидэхийг үгүй гэх аргагүй. Тиймээс Г.Занданшатар өөрийн хүнээ ҮХЦ-ээс буцаан авчирч, Н.Учралын дэргэд тавилаа. Л.Өлзийсайхан парламентын ерөнхий нарийн бичгийн даргаар ажиллангаа Г.Занданшатар, Н.Учрал нарын дундах энхийн харилцааг манах үүрэг хүлээж байна.

УИХ-ын ерөнхий нарийн бичгийн дарга гэдэг бол юм юманд хутгалддаг, хариуцлагатай, нарийн ажил гэдэг нь Б.Баасандоржоос харагдсан. МАН-ын дарга болох гэсэн Д.Амарбаясгалангийн хүслийг биелүүлэхэд нэмэр болох гээд Б.Баасандорж чадаагүй. Эцэстээ Д.Амарбаясгалан ч үгүй, Х.Булгантуяа ч үгүй болж, өөрөө ажлаа өглөө. Л.Өлзийсайхан энэ эмгэнэлт явдлыг давтахгүйн тулд хичээх л болж байна. Гэвч ерөнхий нарийн бичгийн дарга хичээлээ хичээлээ гээд, даргынхаа амбийцийг дарж чадахгүй бол хэцүү. Яг Б.Баасандорж шиг л юм болно.

УИХ-ын ерөнхий нарийн бичгийн дарга Лувсандоржийн Өлзийсайхан  

Боловсрол:

• 1993 онд Нийслэлийн 50 дугаар сургууль;
• 1998 онд МУИХС-ийн Хууль зүйн сургууль;
• 1999 онд МУИС-ийн Хууль зүйн сургуульд хууль зүйн магистр; эрхзүйч мэргэжилтэй, хууль зүйн ухааны доктор (Ph. D), дэд профессор.

Ажилласан байдал:

• 1998-2002 онд Улсын Багшийн Их Сургуульд багш;
• 2002-2016 онд МУИС-ийн Хууль зүйн сургуульд багш, ахлах багш;
• 2007-2012 онд УИХ-ын Тамгын газарт зөвлөх, экспертийн хэсэг хариуцсан ахлах зөвлөх;
• 2012 онд УИХ-ын хууль зүйн бодлогын зөвлөх;
• 2013-2015 онд Шүүхийн ерөнхий зөвлөлийн Шүүхийн хүний нөөцийн газрын дарга;
• 2015-2017 онд Нийслэл дэх Захиргааны хэргийн анхан шатны шүүхийн шүүгч;
• 2017-2018 онд УИХ-ын Тамгын газарт Төрийн байгуулалтын байнгын хорооны ажлын албаны ахлах зөвлөх;
• 2018-2019 онд ЗГХЭГ-ын Стратегийн удирдлага, зохицуулалтын газрын дарга;
• 2019 онд УИХ-ын даргын ахлах зөвлөх бөгөөд Ажлын албаны дарга;
• 2019-2023 онд УИХ-ын ерөнхий нарийн бичгийн дарга
• 2023-2025 онд ҮХЦ-ийн гишүүн