Төрийн өмчит зарим компанид хийсэн хяналт-шинжилгээний дүнгийн талаар Засгийн газрын Хэрэг эрхлэх газрын дарга С.Бямбацогт өнөөдөр Засгийн газарт танилцууллаа. “Эрчист Монгол” ХХК-ийн харьяа, төрийн өмчит компаниудыг удирдлага, менежментээр хангах хүрээнд хяналт-шинжилгээ хийжээ. Түүний мөрөөр холбогдох албан тушаалтанд хариуцлага тооцох, алдаа, зөрчлийг арилгуулах, цаашид харьяа компаниудад хийх хяналт-шинжилгээ, шалгалтыг эрчимжүүлж, үйл ажиллагааг сайжруулах арга хэмжээ авч ажиллахыг Ерөнхий сайд холбогдох албан тушаалтнуудад үүрэг болголоо. 

“Дулааны дөрөвдүгээр цахилгаан станц” ТӨХК-ийн нийт бараа материалын үлдэгдэл 2025.06.30-ны байдлаар 37.4 тэрбум төгрөг байв. 2024 онд гэхэд 1.8 тэрбум төгрөгийн бараа материалыг буруу хадгалсны уршгаар ашиглах боломжгүй болсон байна.  Тус станц зуух 2, зуух 4-т ноднин их засвар хийхдээ 1.1 тэрбум төгрөгөөр төсөвт өртгийг хэтрүүлжээ. Өнгөрсөн жил 61.6 сая төгрөгийн бараа материал акталсан аж. Үүний 90% (55.3 сая.төг) нь техникийн үзүүлэлт таараагүй, шаардлага хангахгүй болжээ. Энэ онд акталсан 367.5 сая төгрөгийн бараа материалын 87.2% (320.3 сая.төг) нь техникийн үзүүлэлт таараагүй, шаардлага хангахгүй болсон байна.

“Эрчист Монгол” ХХК-ийн харьяа “Мэдээлэл холбооны сүлжээ” ХХК 2024, 2025 онд шууд гэрээгээр нийт 5.33 тэрбум төгрөгийн шатахуун худалдан авчээ. Энэ нь Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд заасан нээлттэй тендерийн шаардлагыг зөрчжээ. 

МИАТ ТӨХК-ийн нийт үйл ажиллагааны зардал өмнөх оны мөн үеэс өссөн, харин төлөвлөгөөнөөс доогуур гүйцэтгэлтэй байна. Ажилчдын цалингийн багц зардал 9 тэрбум төгрөгөөр өссөн байна. Энэ нь батлагдсан төсвөөс үндсэн болон түр орон тоо хэтэрсэнтэй холбоотой байна.