Монгол Улс болон Евразийн эдийн засгийн холбоо, түүний гишүүн орнууд хоорондын худалдааны түр хэлэлцээрийг соёрхон батлах тухай хуулийн төслийг өнөөдөр Засгийн газар хэлэлцээд, Улсын Их Хуралд өргөн мэдүүлэхээр тогтлоо. 

ЕАЭЗХ-ны гишүүн орнуудад нийлүүлэх 367 бараанд Монгол Улс гаалийн тарифын хөнгөлөлт, чөлөөлөлт эдэлнэ. Үүний үр дүнд аж ахуйн нэгжүүдийн орлого нэмэгдэж, хөдөө аж ахуйн салбарын шинэ зах зээлд нэвтрэх боломж бүрдэнэ. Дотоодын бизнес эрхлэгчдийн гадаад худалдааны туршлага, чадварыг сайжруулж, олон улсын стандартад нийцсэн бүтээгдэхүүн үйлдвэрлэхэд түлхэц болно. Мөн Монгол Улсын уул уурхайн бус бүтээгдэхүүний үйлдвэрлэл нэмэгдэн, аливаа нэг улсаас хамаарах худалдааны хамаарал багасаж, эдийн засаг төрөлжинө. Энэ нь эдийн засгийн тогтвортой байдалд эерэг нөлөө үзүүлнэ гэж Засгийн газар үзэж байна. 

Хэлэлцээрт хөрөнгө оруулалт, үйлчилгээний худалдаа, банк санхүү, төлбөр тооцоо зэрэг асуудал тусгагдаагүй. Зөвхөн бараа худалдах хүрээнд уг хэлэлцээрийг байгуулахаар тохиролцжээ. Хэлэлцээрийг 3 жилийн хугацаатай байгуулна. Талууд харилцан тохиролцвол уг хугацааг сунгах боломжтой юм байна.