Монголын эмэгтэй DJ артистуудын нэг Layla шинэ дуугаа сонсогчдод хүргэлээ. Тэр анхны цомогтоо оруулах эхний дуугаа “Салхи” нэртэйгээр гаргажээ. 

Түүнээс доорх мэдээллийг тодрууллаа.

-Сонсогчид чамайг DJ гэдгээр мэднэ. Хэзээнээс дуулж эхлэв?

-Би 2013 оноосдуу хөгжим сонирхон, DJ хийж эхэлсэн. Бүжиглэх сонирхол, ур чадвар минь намайг хөгжмийн урлагт хөл тавихад нөлөөлсөн гэхэд болно. Энэ жилээс өөртөө шинэ challenge хийж, дуугаа өөрөө дуулж эхэлж байгаа юм.

-Анхны дуу “Салхи”-иа танилцуулаач? 

-“Салхи” бол миний анхны цомгийн эхний дуу болон гарч байгаа, мелодик техно урсгалын дуу. Монгол хэв маяг, уртын дуугаа орчин үеийн хэмнэлтэй хольж, уг дуундаа шингээсэн. Дууны хөгжмийг шинэ залуу продюсер Becku бид 2 хамт найруулсан. Ая, дууны найруулга дээр дуучин Б.Замбалгарав ажиллаж, дууны шүлгийг Kenn бичин, дууны бичлэгийг “Clef recordings” студийн инженер Одмандах гүйцэтгэсэн. Видео клипийг “March nine” студи бүтээсэн.

-Анхны цомог гэж дурдлаа. Цомгоо хэзээ сонсогчдод хүргэх вэ?

-House, techno урсгалын 5 дуунаас бүрдсэн анхны EP цомгоо гаргахаар ажиллаж байна. Одоогийн байдлаар аудио бичлэгийн ажлууд дуусаж, миксинг мастерын ажлууд хийгдэж байна. 2026 оны эхний сардаа гаргахаар ажиллаж байна.

-Уран бүтээлийн цаашдын зорилгоосоо хуваалцаач?

-Уран бүтээлүүдээ аль болох чанартай сайн гаргаж, үндэсний хэв маяг, монгол ёс заншил, соёлоо уран бүтээлдээ түлхүү шингээж, гадаадын улс оронд таниулан сурталчлахыг хичээдэг.