УИХ-ын хаврын ээлжит чуулганы өнөөдрийн хуралдаанаар /2026.6.26/ Засгийн газраас 5 дугаар сарын 6-ны өдөр өргөн барьсан Татварын багц хуулийн төслийг эцэслэн баталлаа.

Үүнд:

• Татварын ерөнхий хуульд нэмэлт өөрчлөлт оруулах тухай хуулийн төсөл,
• Аж ахуйн нэгжийн орлогын албан татварын тухай хууль нэмэлт өөрчлөлт оруулах тухай хуулийн төсөл,
• Хувь хүний орлогын албан татварын тухай хууль нэмэлт өөрчлөлт оруулах тухай хуулийн төсөл,
• Нэмэгдсэн өртгийн албан татварын тухай хуульд нэмэлт өөрчлөлт оруулах тухай хуулийн төслийг хуралдаанд оролцсон гишүүдийн 87.1 хувийн саналаар эцэслэн батлав.

Татварын багц хуулийн нэмэлт, өөрчлөлт 2027 оны нэгдүгээр сарын 1-нээс хэрэгжиж эхэлнэ.

Уг хуулийн төсөл эцэслэн батлагдсаны дараа ажлын хэсгийн ахлагч, УИХ-ын гишүүн Х.Ганхуяг Татварын багц хуулийн онцлох заалтын талаар мэдээлэл өглөө. Татварын багц хууль батлагдсанаар эдийн засаг 0.7 хувийн функцээр өсөх магадлалтай гэж тооцож байгаа юм.

Онцлох заалтуудаас дурдвал:

• НӨАТ төлөгчийн босго 50 саяас 400 сая болов
• Цалингийн шатлалыг нэмснээр жилийн 36 сая хүртэлр орлоготой иргэний 792000 төгрөг хүртэлх орлогод ногдуулах ХХОАТ-ыг 100% чөлөөлнө
• 2.5 тэрбум хүртэлх борлуулалтын орлоготой 180 мянга орчим ААН-ийн татварын ачааллыг 1%-д хүргэнэ
• 6-10 тэрбумын ашигтай ААН 15 хувиар татвар төлөх дундын шатлал нэмснээр 600 гаруй ААН-ийн татварын ачаалал буурна
• Өртэй татвар төлөгчийн дансыг бүрэн хаахгүй. Орж ирэх мөнгөн хөрөнгийн 30%-ийг дансанд үлдээнэ.

1. ААНОАТ, ХХОАТ-ын тайлан тушаах хугацааг сунгаж, оновчтой болгоно
2. Алдангийн дээд хэмжээ 50 хувиас хэтрэхгүй
3. Татварын тайлан задруулах хугацааг 2 жил хүртэл сунгана
4. НӨАТ төлөх хугацааг 2 сар хүртэл хугацаагаар сунгана
5. Иргэний өөрийнх нь өмч, үл хөдлөх хөрөнгө борлуулсны орлогоос авдаг 2 хувийн татварыг цуцалж, ойлгомжгүй татвараас чөлөөлнө.