Tesla компани аравдугаар сарын 15-нд шинэчилсэн Roadster цахилгаан спорт автомашинаа танилцуулж, 2028 онд үйлдвэрлэж эхлэхээр төлөвлөж байгаагаа зарлалаа. Тус компани дараагийн үеийн Roadster загвараа анх 2017 онд танилцуулж байсан бөгөөд анхны төлөвлөгөөгөөр 2020 онд хэрэглэгчдэд хүргэх ёстой байв.

SpaceX компанитай хамтран бүтээсэн хоёр хүний суудалтай автомашиныг Техас мужийн Макгрегор дахь SpaceX-ийн туршилтын талбайд үзүүлжээ. Үзүүлбэрийн үеэр автомашин тусгай сорох системийн тусламжтайгаар налуу зам дээр доош харж явах, агаарт эргэх, суурилуулсан хөдөлгүүрээр буух боломжийг харуулсан байна. Гэхдээ эдгээр технологийг нийтийн замд ашиглах боломж болон хууль эрх зүйн зохицуулалт тодорхойгүй хэвээр байна.

Tesla-гийн гүйцэтгэх захирал Илон Маскийн мэдээлснээр, шинэ Roadster нь цагт 60 миль буюу 96.6 км хурдыг нэг секунд хүрэхгүй хугацаанд авах бөгөөд дээд хурд нь цагт 230 миль буюу 370 км-ээс давах аж.

Маск 2023 онд уг автомашиныг Tesla-гийн санхүүгийн үзүүлэлтэд томоохон өөрчлөлт авчрахгүй, харьцангуй бага ач холбогдолтой төсөл хэмээн тодорхойлж байв. Гэсэн ч Roadster нь компанийн технологийн боломж, цахилгаан автомашины ирээдүйн талаарх амбицын бэлгэ тэмдэг хэвээр байна.

Эх сурвалж: Reuters