Их Британийн зүүн өмнөд хэсэгт орших Эденбридж хэмээх жижиг хотод жил бүр уламжлал болгон зохион байгуулдаг “Bonfire Night” баярын үеэр энэ бямба гараг буюу арваннэгдүгээр сарын 7-нд FIFA-гийн ерөнхийлөгч Жанни Инфантиногийн дүрсийг шатаахаар болжээ.

Арваннэгдүгээр сарын 4-нд олон нийтэд танилцуулсан аварга том дүрс нь Инфантиног АНУ-ын Ерөнхийлөгч Доналд Трампын элэглэлийн дүрсийг барьж буйгаар бүтээсэн байна. Энэхүү бүтээл нь улс төр, спортын хүрээний нөлөө бүхий хүмүүсийг шоглон дүрсэлдэг баярын уламжлалыг үргэлжлүүлж байгаа аж.

Өнгөрсөн жил тус хотын баярын үеэр Их Британийн тухайн үеийн Ерөнхий сайд Кир Стармерын дүрсийг шатааж байжээ.

“Bonfire Night” буюу Галын наадам нь 1605 оны арваннэгдүгээр сарын 5-нд Английн парламентын ордныг дэлбэлэхээр төлөвлөсөн “Gunpowder Plot” хэмээх бүтэлгүй хуйвалдааныг дурсах уламжлал юм. Тухайн үед Гай Фоксын оролцсон хуйвалдаан бүтэлгүйтсэн бөгөөд түүнээс хойш жил бүрийн энэ үеэр галын наадам, салют буудуулж, тухайн үеийн болон өнөөгийн нэр нөлөө бүхий хүмүүсийн дүрсийг шатаадаг болжээ.

Эденбриджийн баярын үеэр бүтээдэг аварга дүрсүүд нь тухайн жилийн улс төр, нийгмийн үйл явдлыг ёжлон харуулдгаараа алдартай.