Хятад улсын Харбин хотноо 2025 оны хоёрдугаар сарын 7-14-ний өдрүүдэд Азийн өвлийн спортын IX наадам болно. Азийн Олимпын зөвлөлийн ивээл дор дөрвөн жилд нэг удаа болдог уг наадамд гишүүн 45 орноос хамгийн олон буюу 34 улсын баг, тамирчид оролцохоор болсон нь өмнөх наадмуудаас онцлох дээд амжилт юм.

  

Баг, тамирчид 6 спортын 11 төрөлд 64 зай, ангилалд хурд хүч, авхаалж самбаагаа сорин өрсөлдөнө. Тэгвэл манай улсаас тэшүүр, шорт трейк, уран гулгалт, хоккей /эр/, керлинг, цана, уулын цана, снөүборд, биатлоны төрөлд нийт 70 гаруй тамирчид оролцоно.

Энэ удаагийн наадамд шинээр керлинг холимог хос, цанаар уул өөд авирах, уран сайхны гулгалт, фристайлын төрөл нэмэгдсэн орсон нь онцлогтой. Тэгвэл энэхүү наадамд оролцох Монголын баг, тамирчдын төлөөллийн хурал Монголын Үндэсний Олимпын хороон дээр боллоо. Хурлаар өвлийн спортын наадамд оролцох баг, тамирчдын бэлтгэл, сургуулилт, холбоодын уялдаа холбоог сайжруулах, тамирчдын хувцас болон хоол зүйч, сэтгэл зүйчийн асуудал мандат болон наадамтай холбоотой бусад асуудлыг хэлэлцлээ.

Энэ хүрээнд Допингийн эсрэг үндэсний төв, Спортын анагаах ухаан, эрдэм шинжилгээний төвөөс тамирчдад допингийн тухай сургалт явуулж, эл асуудлаас урьдчилан сэргийлэх, тамирчны ёс зүй, сахилга бат, хариуцлагыг дээшлүүлэхийг онцлов. Мөн тамирчдын нэгдсэн хамтарсан бэлтгэл хийх, баг тамирчдыг тэтгэлэгт хөтөлбөрт хамруулах чиглэлээр ажиллаж байгааг цохон тэмдэглэв.

Тус хуралд Олон улсын олимпын хорооны гишүүн, МҮОХ-ны ерөнхийлөгч  Б.Баттүшиг, Монголын үндэсний олимпын хорооны тэргүүн дэд ерөнхийлөгч Ч.Наранбаатар, Монголын үндэсний олимпын хорооны удирдах зөвлөлийн гишүүн, өвлийн Азийн наадамд өрсөлдөх Монголын багийн орлогч дарга Д.Жаргалсайхан болон тус наадамд өрсөлдөх спорт холбоодын төлөөлөл оролцсон юм.

    Монголын өвлийн спортын баг, тамирчид Азийн наадмаас 1 мөнгө, 6 хүрэл медаль хүртсэн амжилтыг үзүүлээд байгаа юм. Тодруулбал 1990 онд Япон улсын Саппоро хотноо болсон наадамд эрэгтэй гүйлтийн цанын баг буухиа төрөлд хүрэл медаль, 2007 оны БНХАУ-ын Чанчүнь хотноо болсон наадмаас уулын цанын төрөлд Ү.Марал хүрэл медаль, 2011 онд Казакстаны Алмата хотноо болсон наадамд бөмбөгтэй хоккейн эрэгтэй баг мөнгөн медаль, мөн цанын зүг чиг олох төрөлд 4 хүрэл медаль хүртсэн түүхтэй.