Азийн Өвлийн Наадам “ХАРБИН 2025”-ийн бамбар асаах ёслол өчигдөр боллоо. Энэ үеэр дэлхий даяар интернэт хэрэглэгчдийг наадмын галт бамбарыг цахимаар буухиалахыг урьсан байна. Олон нийтийн сүлжээ платформуудаар дамжуулан хэрэглэгчид цаг хугацаа, орон зайнаас үл хамааран цахим бамбарын буухианд оролцож энэхүү спорт, соёлын арга хэмжээний нэг хэсэг болж байгаа юм. “Хүйтэн цаг уур ба Халуун сэтгэл – Насан туршийн дурсамжаа бүтээцгээе” сэдвийн дор өрнөж буй энэхүү цахим бамбарын буухианы веб хуудсанд баярын уур амьсгал оруулахын тулд болор хөх өнгөөр чимж, голт бор, сальютны элементүүдийг тусгаж өгчээ. Наадмын албан ёсны сахиус “Бинбин” “Нини” нарын хөдөлгөөн нь веб хуудсыг илүү хөгжилтэй болгож буй.

Энэхүү цахим арга хэмжээнд оролцох нь дэлхийн өнцөг бүрийн интернэт хэрэглэгчдэд нээлттэй бөгөөд Вичат дээрх “Харбин 2025 Азийн өвлийн 9-р наадам” албан ёсны хуудсаар зочлон “Дижитал Бамбар” товч дээр дарах эсвэл “Онлайн Бамбар Буухиа” гэсэн түлхүүр үгсээр хайлт хийн нэвтэрч Азийн өвлийн наадмын Цахимаар бамбар өртөөлөгч болоорой. Бамбар өртөөлөгч бүрд нь гэрчилгээ олгох бөгөөд гэрчилгээний дугаарыг үндэслэн санамсаргүй байдлаар Өвлийн наадмын мерчиндайзын эзэн болох боломжтой юм хэмээн Монголын Үндэсний Олимпын хорооноос мэдээллээ.

Ташрамд дурдахад, БНХАУ-ын Харбин хот IX Азийн өвлийн наадамд Монгол улсаас цана, тэшүүр, биатлон болон кёрлингийн спортын төрөлд нийт 36 тамирчин оролцох юм.