Урлагт сюрреализмын урсгалыг үүсгэн бий болгосон, Испанийн нэрт зураач Сальвадор Дали-гийн уран бүтээлийн үзэсгэлэн анх удаа Энэтхэг улсад тавигдахаар болжээ.

Энэтхэгийн нийслэл Дели хотод баасан гарагт нээгдэх үзэсгэлэнд зураачийн 200 гаруй хар зураг, эскиз болон усан будгийн бүтээлүүд тавигдаж, үзэгчдийн хүртээл болох юм байна.

Эдгээр үзмэрүүд нь Сальвадор Дали-гийн анд нөхөр, Францын цуглуулагч Пьер Аргилле-гийн цуглуулга бөгөөд түүний охин Кристин Аргилле үзэсгэлэнгийн куратороор ажиллаж байгаа ажээ.

Сальвадор Дали-гийн уран бүтээлийн үзэсгэлэнг Энэтхэг улсад гаргах энэхүү төсөл 5 жил үргэлжилсний эцэст ийнхүү биеллээ олж байна.

Bruno Art Group хэмээх олон улсын урлагийн галлерей уг үзэсгэлэнг гаргаж байгаа юм байна.

“Dali comes to India” буюу “Дали Энэтхэгт ирлээ” хэмээн нэрлэсэн уг үзэсгэлэн Дели хотын India Habitat Centre цогцолборт 2-р сарын 7-13 хооронд, Bruno Art Group-ын харьяа Masarrat галлерейд 2-р сарын 15-наас 3-р сарын 16-ны хооронд гарахаар болжээ.