Ерөнхийлөгчийн сонгуульд дахин өрсөлдөхийг нь эсэргүүцэж, сөрөг хүчний зүгээс бүрэн эрхийг нь түдгэлзүүлэх саналыг парламентад өргөн бариад байсан Румын улсын ерөнхийлөгч Клаус Йоханнис даваа гарагт албан тушаалаасаа өөрийн хүсэлтээр огцорч байгаагаа мэдэгджээ. Тэрээр энэ талаараа ерөнхийлөгчийн ордонд хэвлэлийн бага хурал зохион байгуулж мэдэгдсэн байна.

Эргэн сануулахад, өнгөрсөн оны 12-р сард явагдсан Румын улсын ерөнхийлөгчийн сонгуулийн эхний шатанд Клаус Йоханнис өндөр хувийн саналаар тэргүүлсний дараа улс төрийн хэт барууны үзэлтэй сөрөг хүчнийхэн эрс эсэргүүцэж, сонгуулийн үр дүнг хэрэгсэхгүй болгож байсан бол эсрэгээрээ сонголтоо хийсэн ард түмэн өнгөрсөн сард сонгуулийг цуцлах шийдвэрийг эсэргүүцсэн жагсаал цуглааныг өнгөрсөн сард зохион байгуулсан юм.

ЕХ-г дэмжигч ерөнхийлөгч Клаус Йоханнис ирэх 5-р сард явагдахаар болсон ерөнхийлөгчийн сонгуулиар дараагийн төрийн тэргүүн тодрох хүртэл албандаа үлдэнэ гэж мэдэгдсэн ч сөрөг хүчний хууль тогтоогчид даваа гарагт гарсан парламентын хоёр танхимын байнгын хорооны шийдвэрийн дагуу мягмар гарагт парламентыг хуралдуулж, ерөнхийлөгчийн бүрэн эрхийг түдгэлзүүлэн, ерөнхийлөгчид итгэл үл үзүүлэх тухай асуудлаар ярилцахаар болоод байсан юм.

Үүнийх нь хариуд Клаус Йоханнис өөрийн хүсэлтээр огцорно гэдгээ ийнхүү мэдэгджээ. Тэрээр “Румын улс, Румыны ард түмнийг хямралаас хамгаалахын тулд миний бие Румын улсын төрийн тэргүүний албан тушаалаас өөрийн хүсэлтээр огцорч байна” хэмээн даваа гарагт мэдэгдсэн байна. Клаус Йоханнис 2 сарын 12-ны лхагва гарагт албан ёсоор огцорч, албан тушаалаа өгөх болно гэжээ.

Румын улсын ерөнхийлөгчийн сонгуулийн эхний шат 5 дугаар сарын 4-нд явагдах бол хоёр дах шатны сонгуулийн товыг 5-р сарын 18-наар тогтоожээ.