Д.Трамп ерөнхийлөгчийн албандаа орсон даруйдаа буюу өнгөрсөн сарын 20-ны өдөр Мексикийн буланг Америкийн булан болгон өөрчилж нэрлэх зарлигт гарын үсэг зурж байсан.

Тэгвэл тэрээр энэ сарын 9-ний өдөр дээрхтэй холбоотой өөр нэгэн зарлигт гарын үсэг зурсан талаар мөн өдөр АНУ-ын ерөнхийлөгчийн тусгай туслах, харилцаа холбооны зөвлөх Марго Мартин нийгмийн сүлжээгээр дамжуулан мэдэгдсэн байна.

Дээрх мэдэгдэлд АНУ-ын ерөнхийлөгч 2025 оны 2 дугаар сарын 9-ний өдрийг анхны “Америкийн булангийн өдөр” болгон зарласан бөгөөд дээрх зарлигт онгоцонд нисэж байхдаа гарын үсэг зурсныг мэдээлжээ.

Д.Трампын дээрх зарлигийг мөн албан ёсоор Цагаан ордны вебсайтад нийтэлснийг эндээс харах боломжтой.

Тус зарлигт Д.Трамп “миний бие төр засгийн албаны хүмүүс болон АНУ-ын бүх иргэдийг энэхүү өдрийг тусгай хөтөлбөр, баяр ёслолын үйл ажиллагаа зохион байгуулж тэмдэглэж байхыг уриалж байна” гэжээ.

Мексикийн буланг “Америкийн булан” болгож өөрчлөн нэрлэх тухай Д.Трампын 1-р сарын 20-ны өдрийн зарлигийн талаар Мексикийн ерөнхийлөгч Клаудия Шейнбаум 1-р сарын 21-ний өдөр хэлэхдээ, “Мексикийн булангийн нэрийг өөрчлөх тухай АНУ-ын ерөнхийлөгч Д.Трампын зарлиг зөвхөн АНУ-д л хамаатай, харин Мексик болон дэлхийн хувьд “Мексикийн булан” гэж нэрлэсэн хэвээрээ л байх болно гэсэн юм.