Украины тагнуулын албаны ажилтанг Оросын талд ажилладаг тагнуул байсан хэрэгт сэжиглэн баривчилсан талаар тус албаны зүгээс мэдэгджээ.

Украины тагнуулын албанаас гаргасан мэдэгдэлд түүний нэрийг дурьдаагүй ч тус албаны терроризмын эсрэг төвийн штабын дарга байсан хэмээн мэдээлсэн байна.

Харин Украины хэвлэлүүд тагнуулын албаны нэрээ нууцалсан эх сурвалжуудыг эш татан тухайн сэжигтэнг хурандаа Дмитро Козюра хэмээн мэдээлж эхэлсэн байна. Хэвлэлүүд мөн Украины тагнуулын албаны дарга Васил Малюкын Д.Козюраг гавлан, баривчлаад байгаа гэрэл зураг, дүрс бичлэгийг нийтэлсэн байна.

Украины тагнуулын албаны мэдэгдэлд “харх” хэмээн тодорхойлсон тухайн сэжигтэнг Оросын талд ажиллан, мэдээлэл цуглуулж дамжуулсан 14 тохиолдлыг баримтаар илрүүлэн тогтоосон ба дотоод тусгай мөрдлөгийг тухайн сэжигтний гар утас, компьютерт нэвтрэх, яриа болон үйлдлийг ажиглан бичиж явуулсан болохыг дурджээ.

Албаны дарга В.Малюк сэжигтэнг тагнаж шалгах мөрдөх ажиллагаанд өөрөө биечлэн оролцож, түүнийг баривчлах ажиллагааг удирдан явуулж, мөрдөн шалгах баривчлах үйл явцын талаар ерөнхийлөгч В.Зеленскийд шууд тайлагнан мэдээлж байсан талаар Украины тагнуулын албаны мэдэгдэлд онцолжээ.

Түүнчлэн ОХУ-ын Холбооны аюулгүй байдлын алба 2018 онд Австрийн нийслэл Вена хотноо сэжигтэн этгээдийг өөрсдийн талд урвуулж, элсүүлэн авсан бөгөөд түүнтэй хамгийн сүүлд 2024 оны 12-р сард холбогдсон байсан гэжээ.

2022 оны 2-р сард ОХУ Украинд түрэмгийлэн халдан довтолсноос хойш Украин улс өөрийн газар нутаг дээрх Оросын тагнуулуудыг илрүүлэх олон тооны ажиллагааг явуулсаар байгаа юм.