Google Maps аппликейшн тус аплликейшныг АНУ-д хэрэглэж байгаа хэрэглэгчдэд зориулан Мексикийн булангийн нэрийг “Америкийн булан” болгон өөрчилсөн байна.

Google компанийн зүгээс газарзүйн байршлын нэр томьёог АНУ-ын төр засгийн албаны эх сурвалжаас авдаг бөгөөд Д.Трампын гаргасан зарлиг тушаалын дагуу дээрх нэр томьёонд өөрчлөлт орсонтой холбогдуулан ийнхүү Google Maps аппликейшн дээрх Мексикийн булангийн нэрийг өөрчилснөө тайлбарлажээ.

АНУ-ын Дотоод хэргийн департаментын харьяанд байдаг Газарзүйн нэр томьёоны мэдээллийн системийн санд ерөнхийлөгчийн зарлигийн дагуу Америкийн булан, Маккинли уул зэрэг өөрчлөлтүүдийг хийсний дараа даваа гарагт Google компани өөрийн Maps аппликейшнд дээрх өөрчлөлтийг оруулсан байна.

Түүнчлэн энэхүү булангийн нэршлийн өөрчлөлт зөвхөн тус аппликейшны Америк дах хэрэглэгчдэд харагдах бөгөөд Мексик болон дэлхийн бусад орны хэрэглэгчдэд “Мексикийн булан” хэвээрээ харагдана гэдгийг мэдээлсэн байна.

АНУ-ын ерөнхийлөгч Д.Трамп мөн 2-р сарын 9-ний өдрийг “Америкийн булангийн өдөр” болгон зарлаж, энэхүү өдрийг тэмдэглэн өнгөрүүлж байхыг төрийн байгууллагууд болон ард иргэддээ уриалсан билээ.

Харин Мексикийн ерөнхийлөгч Клаудиа Шэйнбаум Мексикийн булангийн нэрийг өөрчилсөн шийдвэрээ дахин нэг харгалзаж үзэх саналыг Google компанид тавьсан байна. Тэрээр НҮБ-ын Далай тэнгисийн хуулийн хүрээний конвенцийн дагуу хууль эрхзүйн хувьд АНУ-д булангийн нэрийг өөрчлөх ёсгүй гэдгийг онцолжээ.

Олон улсын хэвлэл мэдээллийн Associated Press агентлаг мөн Мексикийн булан гэдэг нэршлийг өөрчлөхгүй, энэ чигээр ашиглана хэмээн мэдэгдсэний дараа Цагаан ордны зүгээс тус агентлагийн сэтгүүлчийг Цагаан ордны Зууван танхим дах ерөнхийлөгчийн зарлиг, тушаалын сурвалжлага мэдээлэл бэлтгэхийг нь хориглож байгаагаа мэдэгдсэн байна.