Орон нутгийн цагаар пүрэв гарагийн 11 цагийн орчимд Тайванийн Тайчунь хотын их дэлгүүрт ахуйн хийн дэлбэрэлт болсны улмаас наад зах нь 5 хүн амь үрэгдэж, 13 хүн бэртэж гэмтээд байгаа талаар эх сурвалжууд мэдээллээ.

Уг дэлбэрэлт “Шин Конг Мицүкоши” хэмээх тухайн их дэлгүүрийн цайны газар, гуанзууд байрладаг 12 давхрын засварт ороод байсан хэсэгт гарсан талаар Тайчунь хотын гал сөнөөх газраас мэдээлсэн байна.

Онцгой байдлын албаныхан дэлбэрэлт болсон газарт 11:30 минутын орчимд ирж, дэлбэрэлтээс үүдэлтэй галыг унтрааж, аврах ажиллагааг явуулсан байна.

Барилгын засварын ажил үргэлжилж байхад гарсан энэхүү дэлбэрэлтийн шалтгааныг олж тогтоох, мөрдөн шалгах ажлыг мөн эхлүүлжээ.

Тайчунь хотын дарга Лу Шио Ень хэлэхдээ, аврах ажиллагааг нэн тэргүүнд гүйцэтгэж байгаагаас гадна дэлбэрэлтийн шалтгааныг олж тогтоох, бусад боломжит аюул эрсдлийн үнэлгээг гаргаж, шалгах ажлууд мөн хийгдэж байгааг онцолж, их дэлгүүртэй ойролцоо оршдог түүний ажлын өрөөнд дэлбэрэлт мэдрэгдсэн тухай ярьсан байна.

Тайванийн ерөнхийлөгч Лай Чиндэ мөн энэхүү дэлбэрэлтийн хэрэг явдлын учир шалтгааныг сайтар мөрдөн шалгаж олохыг уриалсан мэдэгдлийг өөрийн Facebook хуудсандаа нийтэлсэн байна.