“Nissan Motor” болон “Honda Motor” компаниуд нэгдэх асуудлаарх яриа хэлэлцээний эцсийн шийдвэрийг пүрэв гарагт гаргахаар болоод байгаа талаар Японы NHK агентлаг мэдээллээ. Японы автомашин үйлдвэрлэгч эдгээр компани нэгдэх талаар өнгөрсөн оны 12-р сараас эхлэн яриа хэлэлцээ явуулсаар ирсэн боловч сүүлдээ “Honda” компани стратегиа өөрчилж, “Nissan”-ы хувьцааг худалдан авч, тус компанийг бүрэн эзэмших санал тавьсан юм. “Nissan” компани уг саналаас татгалзаж, “Honda” компанитай нэгдэх яриа хэлэлцээг цуцлах болно гэдгээ мэдэгдсэн билээ.

Тэгвэл хоёр компанийн удирдах зөвлөлийн уулзалт өнөөдөр болж байна. Ажиглагчдын хэлж байгаагаар компаниуд нэгдэх асуудлаарх яриа хэлэлцээг зогсоох шийдвэр гаргаж магадгүй гэж харж байгаа ажээ.

Анхандаа тэд цахилгаан автомашины үйлдвэрлэлээр дэлхийд тэргүүлэгч АНУ болон Хятадын компаниудтай өрсөлдөх зорилгоор компаниудаа нэгтгэж, техник технологи, програм хангамжийн солилцоо хийх хэлэлцээ явуулж, тэр ч бүү хэл “Mitsubishi” компанийг ч татан оролцуулах асуудал яригдаж байсан ч өнөөдөр нэгдэх яриа хэлэлцээгээ зогсоох хэмжээнд хүрээд байна.

Салбарын эксперт мэргэжилтнүүд үүнийг “Nissan” компанийн бизнесийн үзүүлэлт муу байгаатай холбон тайлбарлаж байна. Өнгөрсөн оны 11-р сард “Nissan” компани үүний эсрэг арга хэмжээ авч, төсөв зардлаа хэмнэх үүднээс үйлдвэрлэлийн хэмжээгээ 20 хувиар бууруулж, 9000 хүн цомхтгосонюм.