Хамас бүлэглэл Израилтай байгуулсан гал зогсоох тохиролцооны үүргээ даган мөрдөж, хуваарийн дагуу барьцааны хүмүүсийг үргэлжлүүлэн суллах болно гэдгээ мэдэгдэж, үүгээрээ дайн байлдаан ахин сэргэхээс сэргийлж чадна гэдэгт итгэж найдаж байгаагаа илэрхийлжээ.

Хамас бүлэглэл болон зуучлагч Египет, Катар улсын дипломатчдын ээлжит уулзалт Египетийн нийслэл Каир хотноо лхагва, пүрэв гарагуудад явагдсан бөгөөд Хамас бүлэглэл болон зуучлагчдын зүгээс гал зогсоох тохиролцоонд учирч буй саад, бэрхшээлүүдийг зохицуулан даван туулах болно гэжээ. Египет болон Катарын төв хэвлэл мэдээллийн хэрэгслүүдээр уулзалт, яриа хэлэлцээ амжилттай болсон талаар мэдээлсэн бол Израилын хэвлэлүүдээр дээрх мэдээллийг “хуурамч мэдээ” гэжээ.

Уулзалтын дараагаар Хамас бүлэглэлээс гаргасан мэдэгдэлд тус бүлэглэл тохиролцооны бүх дүрэм журам, үүргүүдийг биелүүлэх чухал шаардлагатайг онцолж, ялангуяа Газын зурваст илгээх хүмүүнлэгийн тусламжийн цуваа, майхан, барилгын хүнд машин техник, эм тариа, шатахууны хангамжийн асуудлууд дээр онцгой анхаарч ажиллах шаардлагатай байгааг тодотгожээ.

Энэ долоо хоногийн эхээр Хамас бүлэглэл Израилын талыг тохиролцооны үүргээ дагаж мөрдөхгүй байна хэмээн буруутгаж, барьцааны хүмүүсийг суллах явдлыг хойшлуулна гэж мэдэгдсэний дараа Израилын ерөнхий сайд бямба гарагт барьцааны хүмүүсийг суллахгүй бол гал зогсоох тохиролцоог дуусгавар болгож, дайн байлдааны ажиллагааг эхлүүлэх болно хэмээн тулган шаардсан юм.

Тэгвэл Хамасын зүгээс хийсэн тохиролцооны үүргээ биелүүлж, барьцааны хүмүүсийг суллах болно гэсэн мэдэгдэлд Израилын засгийн газрын хэвлэлийн төлөөлөгч ямарваа нэгэн хариу мэдэгдэл хийгээгүй ч “хэрвээ Хамас бямба гарагт барьцааны 3 хүнийг суллахгүй бол гал зогсоох тохиролцоо дуусгавар болно” хэмээн ерөнхий сайдын өмнөх байр суурийг давтан илэрхийлсэн байна.