“Даншиг наадам-Хүрээ цам” шашин, соёлын наадмыг ирэх 6 дугаар сард зохион байгуулахаар нийслэлийн засаг дарга захирамж гаргажээ. Даншиг наадам 6 дугаар сарын 21, 22-нд Төв цэнгэлдэх хүрээлэн болон Хүйдолоонхудагт болно. Наадмын хурдан морины уралдааныг Хүйдолоонхудагт, харин үндэсний болон буриад, өвөрмонгол бөхийн барилдаан, цам харайх ёслол тэргүүтэй шашны зан үйлийг Төв цэнгэлдэх хүрээлэнд, сур, шагайн харвааг сур, шагайн асарт зохион байгуулна.

Тус наадам Төв цэнгэлдэх хүрээлэнд гурав дахь удаагаа болох гэж байна. Өмнө нь 2017, 2019 онд наадмыг цэнгэлдэхэд зохион байгуулж байсан юм. Даншиг наадмын үндэсний бөхийн барилдаанд 256, буриад болон өвөрмонгол бөхөд 64 хүчтэн зодоглох аж. Шагайн харвааны спорт энэ жилийн даншиг наадмын хөтөлбөрт шинээр багтсанаараа онцлогтой.

“Даншиг наадам-Хүрээ цам” наадмыг 2015 оноос сэргээн зохион байгуулж эхэлсэн бөгөөд жил бүрийн 8 дугаар сард болдог байсныг 2025 оноос өөрчилж байгаа аж.