Кино сонирхогчид, шүүмжлэгчдийн хүлээлтэд багтаж, ирэх гуравдугаар сард нээлтээ хийхээр товлосон 3 монгол киног танилцуулъя.
“Цөвүүн цаг”
Киноны шуум явж эхэлсэн цагаас “Хэзээ гарах вэ? Хэзээ нээлтээ хийх вэ” гэдэг асуултад дарагдаж, үзэгчдэд нэлээдгүй өндөр хүлээлт үүсгээд байгаа “Цөвүүн цаг” уран сайхны киног аав, хүү хоёр хамтран найруулсан гэдгээр онцлогтой. Найруулагч О.Бат-Өлзий, түүний хүү Б.Тамир нар Монголын кино урлагт нэр хүндтэйгээс гадна чанартай олон уран бүтээл толилуулсан.
Тэрээр Монголын хамгийн анхны 300 сая үзэгчтэй киноны эзэд, “Фантастик продакшн”-ы дараагийн уран бүтээл гэдгээр нь уг киног үзэгчид ихэд хүлээж буй. “Жийж продакшн”, “MBT entertainment”, “Рэд Пойнт медиа” хамтран бүтээсэн “Цөвүүн цаг” уран сайхны кино 2025.03.06-ны өдрөөс бүх кино театраар гарна.
“In da house-3: Korea”
Жүжигчин Н.Баясаа, С.Батзориг, Г.Лхагвацэрэн, У.Цогтбаяр, Р.Сүхболд нар хамтран “In da house” адал явдалт, инээдмийн уран сайхны киног 2021 онд үзэгчдэд хүргэж байв. Үүний дараа 2022 онд найруулагч Ц.Амартүвшингийн найруулгаар “In da house: Come back” киног үргэлжлүүлэн бүтээж, олонд хүргэсэн юм. Эхний анги нь нэлээдгүй шүүмж дагуулсан ч хоёрдугаар анги нь чамлахааргүй ахиц гаргасан билээ.
Харин энэ удаад тэд хүч нэмж, Солонгосын А зэрэглэлийн жүжигчид болох Ги Жү Бун, Юн Жэ Мүн нарыг урьж, кинондоо тоглуулжээ. Киноны зургийг Солонгос улсад авсан бөгөөд нэг тэрбум төгрөгөөр бүтээсэн байна. Шүүмжлэл, магтаалыг зэрэг дааж яваа залуу жүжигчдийн бүтээл “In da house-3: Korea” кино 2025.03.06-нд үзэгчдэд хүрэх юм. Мөн энэхүү киног БНСУ-ын CGV сүлжээ кинотеатрт гаргахаар болжээ.
“Аминч”
“Хувьсал” продакшн дараагийн уран бүтээлээ “Аминч” нэртэйгээр үзэгчдийн хүртээл болгох гэж байна. “Team Hero”-тэй хамтран бүтээсэн эл киноны зохиолыг Г.Бямбасүрэн, Б.Баатар нар хамтран бичсэн бол ерөнхий продюсероор Ц.Анударь, ерөнхий найруулагчаар Г.Бямбасүрэн ажиллажээ. Энэхүү киноны гол дүрийн жүжигчинд реппэр ThunderZ буюу Б.Өлзий-Учрал тоглосон нь үзэгчдийн сонирхлыг ихэд татаж буй. Энэхүү кино түүний гол дүрд нь тоглосон анхны дэлгэцийн уран бүтээл юм.
Эмэгтэй гол дүрт Гавьяат жүжигчин У.Уранчимэг тоглосон бөгөөд “Хувьсал” продакшны дэлгэцийн 9 дэх уран бүтээл болж байгаа юм.