Сар шинийн баяр удахгүй болно. Харин золгох нь энэ баярын хүрээн дэх хамгийн гол ёс.Т эгвэл энэ жил золгохдоо үнсэж, үнэрлэхээс татгалзахыг Нийгмийн эрүүл мэндийн үндэсний төв зөвлөсөн байна. Энэ цаг үед менингококк, улаанбурхан зэрэг халдварт өвчин анхаарал татсан хэвээр байгаа юм. Тиймээс хоорондоо золгохдоо үнсэхгүй байх, ялангуяа бага насны хүүхдийг үнсэхгүй байхыг сануулж байна. Менингококкийн халдвар авсан гурван настай хүүхэд өнгөрсөн сард эндсэн. Тус халдвар 1-5 сар хүртэл тархана гэдгийг ХӨСҮТ анхааруулж байсан.

Менингококкоор өвдсөн хүний амь нас цаг минутаар хэмжигдэж эхэлдэг тул шинж тэмдэг илэрсэн бол яаралтай эмнэлэгт хандахыг сануулж байна. Менингококк тусвал хүний тархины бүрхүүл үрэвсэж, хурдан хүндэрдэг тул амны хаалт зүүж, дархлаагаа дэмжих нь чухал аж. Энэ ч утгаараа эрүүл мэндийн байгууллагууд баярын өдрүүдэд хамгийн ачаалалтай ажилладаг.

Тэгвэл Сар шинийн баярын үеэр хөл хөдөлгөөн нэмэгдэж, томчууд халдвар тээгч болдог учраас баярын дараа энэ төрлийн халдвар эрс нэмэгдэж болзошгүй. Тиймээс НЭМҮТ-ийн ЭМДМА-ны мэргэжилтэн Ч.Анаргоо “Улаанбурхан, салхинцэцэг, менингококк зэрэг өвчин дулаан орж байгаа энэ цаг үед нэмэгдэх эрсдэлтэй. Түүнчлэн Цагаан сарын баярын өдрүүдэд халдварт өвчин их тархдаг. Иймд хамаатан садантайгаа золгож, мэнд мэдэхдээ аль болох үнсэхгүй, үнэрлэхгүй байхыг зөвлөж байна” гэж хэлжээ.