Энэ сарын 7-ны өдөр Хэнтий аймгийн Баян-Овоо суманд иргэний буруугаас болоод хээрийн түймэр гарч, гурван аймгийн 7 сумыг хамарсан. 2025.03.11-ний өдрийн 11 цагийн байдлаар Сүхбаатар аймгийн Эрдэнэцагаан, Асгат суманд гарсан түймрийг цурманд оруулаад, бүрэн унтраахаар ажиллаж байгаа талаар ОБЕГ-ын Гал түймэртэй тэмцэх хэлтсийн дарга, хурандаа Ц.Нямбаяр мэдээллээ.

Тэрээр “3-р сарын 10-ны өдрийн байдлаар бүртгэгдсэн бусад түймрийг бүрэн унтрааж, сум орон нутгийн холбогдох хүмүүст хүлээлгэж өгсөн. Түймэр унтраасны дараа Монгол Улсын Засгийн газрын тогтоолоор түймрийн хохирлыг тогтоох ажлын хэсгүүд сум орон нутагт ажиллаж байна. 170 орчим мянган га талбай түймэрт өртсөн. Урьдчилсан байдлаар 38 гэр, 4 чингэлэг, 4 автомашин, 2 мотоцикл, 48 хашаа саравч, 3706 бог, 48 бод мал, 3500 орчим боодол өвс шатсан мэдээлэл ирж байна. Түймрийн хохирлыг эцэслэн тогтоогоогүй байна” гэв.

Мөн өчигдөр /03.10/-ны өдөр онцгой байдлын байгууллагад Дундговь аймгийн Өндөршил, Хэнтий аймгийн Өмнөдэлгэр суманд түймэр гарсан тухай дуудлага ирсэн байна. Энэ дагуу онцгой байдлын байгууллага тэдгээр түймрийг унтраажээ.