Хавар болоход хүний бие махбодь, сэтгэл санаа хэрхэн өөрчлөгддөг талаар сэтгэлзасалч, эмч Д.Эрдэнэбаатартай ярилцлаа.

Хавар болоход хүний сэтгэл санаа, бие махбодид өөрчлөлт ордог. Энэ нь юунаас үүдэлтэй вэ?
Хавар, намар хүний хууч өвчин сэдрэх тохиолдол байдаг. Байгаль, цаг уурын өөрчлөлттэй холбоотойгоор хүний бие махбодь, сэтгэл санааны ачаалал нэмэгддэгтэй энэ нь холбоотой. Өвөл хүйтэн болдог учраас бодисын солилцоо удааширч, хүний сэтгэл санаанд тодорхой хэмжээний ачаалал өгдөг. Өвөл амьтад ичээндээ ордогтой адилхан хүний биеийн ачаалал ихсэж, нөөцөө шавхаж эхэлдэг. Өвлийн турш нөөцөө шавхчихаар хүний бие, сэтгэл сульдана шүү дээ. Яг энэ үед хавар ирнэ. Энэ үед ямар ч эрч хүчгүй болж эхэлдэг. Хавар өдөр уртсаж, шөнө богиносохоор хүний биед ачаалал өгч, тэр нь сэтгэцэд нөлөөлж байдаг. Бүх хүнд адилхан.

Хаврын синдром яг хэзээнээс эхэлдэг юм бол?
Дунджаар хоёрдугаар сарын сүүлчээр эхэлдэг. Тухайн хүний сэтгэл санаа ямар онцлогтой вэ гэдгээс хамаарч, Цагаан сарын үеэс хаврын синдром эхэлдэг. 2-5 дугаар сар хүртэл сэтгэл санааны асуудалтай хүмүүс эрс олширдог.
Үүнийг хаврын синдром гэж нэрлэх нь зөв үү?
Ард түмэн бол хаврын синдром гэж нэрлээд сурчихсан. Ерөнхийдөө сэтгэцийн хам шинж гэсэн үг. Олон өвчин зэрэг сэдрэхийг хэлж байгаа юм. Тэгэхээр хаврын синдром гэж нэрлэх нь буруу зүйл биш ээ.

Яг ямар шинж тэмдэг илрэх вэ. Сэргийлэх ямар арга зам бий юү?
Хамгийн түрүүнд хүн амархан ядарч эхэлнэ. Тэгээд нойргүйдэх, сэтгэл санаанд өөрчлөлт орох гээд олон шинж тэмдэг бий. Иймээс хүн өөрийгөө байнга ажиглаж байх хэрэгтэй. Мэдээж хэрэг дархлаагаа сайн дэмжих, амин дэмтэй хоол идэх, сайн унтаж амрах, спортоор хичээллэх нь зүйтэй.