Чех улсын Прага хот дахь Үндэсний музейд “Чингис хаан: Монголчууд Дэлхийг өөрчилсөн нь” үзэсгэлэн нээлтээ хийлээ. Үзэсгэлэнгийн нээлтэд Монгол Улсын Ерөнхийлөгч У.Хүрэлсүх, Чех улсын Ерөнхийлөгч Петр Павел нар оролцов. Алдарт Луврын музей тэргүүтэй Европын томоохон музей, архивын сан хөмрөгт буй дурсгалуудыг нэгэн дор дэлгэсэн энэ үзэсгэлэн монголчууд Дэлхийд хэрхэн нөлөө үзүүлж, амар амгаланг тогтоон, соёл, худалдаа, эдийн засаг, улс төрийн хувьд хэрхэн өөрчилснийг илтгэх эртний улсуудын түүхтэй холбоотой дурсгалууд, Монголын Эзэнт Гүрэний дурсгал, хаад, түүний угсааныхны дурсгал хэсгээс бүрджээ.
Монголын Эзэнт Гүрэн, Ил хант, Юань, Кидан Улстай холбоотой дурсгалуудыг хадгалж буй Луврын музей, Францын үндэсний архив, Севрийн үндэсний керамикийн музей, Чимэглэлийн урлагийн музей болон Швейцарийн Ритберг музей, цуглуулагч Сэм ба Мирна Майэрсын цуглуулга зэрэг Европын таван томоохон музей, архиваас татаж авчирсан үзмэрүүдийг толилуулж энд байна.
Чингис хаан үндэсний музей, Шинжлэх ухааны академийн Археологийн хүрээлэнгийн 698 ширхэг үзмэр, эд өлгийн зүйлийг уг үзэсгэлэнд дэлгэжээ.
Үзэсгэлэнг 3 дугаар сарын 10-наас 6 дугаар сарын 22 хүртэл Чехийн үзэгчид, тус улсаар аялагчдад толилуулна.
Ил хаант, Юань, Кидан Улс, Хүннү гүрний үеийн ховор чухал дурсгалууд нь Монгол нутгаас олдоогүй бөгөөд Чингис хааны байгуулсан Их Монгол Улсын бүх харьяа улсуудын дурсгалуудыг анх удаа нэг дор дэлгэжээ.
Үзэсгэлэнгийн онцлох гол дурсгал нь 1305 онд Ил хаан Өлзийтөөс Францын хаан Гоо Филиппт илгээсэн монгол бичгийн захидал юм. Энэ захидал нь монгол хаадын бичиг соёлын дахин давтагдашгүй үнэт өв, төрт ёсны аугаа уламжлал, монгол бичгийн гайхамшиг, монголын их амар амгаланг бүрэн илэрхийлдэг, үнэлж баршгүй түүхэн баримтад тооцогддог.
Үзэсгэлэнг 2025 оны 10 дугаар сард Цюрих хотын Ритберг музей, 2026 онд Берлиний түүхийн музей, Канад, АНУ зэрэг улсад дэлгэхээр төлөвлөж байна.
Монгол Улс, БНФУ-ын Ерөнхийлөгчийн ивээл дор Францын Нант хотод 2023 онд дэлгэсэн уг үзэсгэлэнг зургаан сарын хугацаанд 250 гаруй мянган хүн үзэж сонирхжээ. Үүний дараа Монголд Чингис хаан үндэсний музейд авчран, монголчуудад толилуулсан билээ.