АНУ, Украины яриа хэлэлцээ мягмар гарагт Саудын Арабын Жидда хотноо явагдлаа. Украины ерөнхийлөгч В.Зеленскийн Вашингтоны айлчлал бүтэлгүйтсэний дараагаар зохион байгуулагдсан хоёр талын дипломат төлөөлөгчдийн энэ удаагийн уулзалт нэлээд дорвитой үр дүн авчраад байна.
8 цаг гаруй хугацаанд үргэлжилсэн уулзалтын дараагаар гаргасан хоёр талын хамтарсан мэдэгдэлд АНУ Украинд үзүүлэх зэвсгийн тусламж болон тагнуулын мэдээлэл солилцох явдлыг эргэн сэргээхээр болсныг зарласан бол Украины талаас хэрвээ ОХУ хүлээн авч зөвшөөрсөн тохиолдолд Украин улс 30 хоногийн хугацаанд гал зогсоох хүсэлтэй байгаагаа илэрхийллээ. Өөрөөр хэлбэл ОХУ мөн дээрх хугацаанд ижил гал зогсоосон тохиолдолд Украин улс АНУ-ын тавьсан 30 хоногийн хугацаанд гал зогсоох саналыг хүлээж авахад бэлэн байгаагаа илэрхийлжээ.
АНУ-ын төрийн нарийн бичгийн дарга Марко Рубио уулзалтын дараагаар хийсэн мэдэгдэлдээ “одоо бид Украины тавьсан саналыг Оросын талд хүргэх болно, бид тэднийг уг саналыг хүлээн авч, энхийг тогтооно гэдэгт итгэж байна, одоо эцсийн чухал шийдвэрийг Оросын тал л гаргах болно” гэжээ. Тэрээр “Украин галаа зогсоож, яриа хэлэлцээ хийхэд бэлэн байна, хэрвээ ОХУ энэ саналаас татгалзвал бид харамсалтай нь энхийн саад тотгор хаана байгааг мэдэх болно” гэсэн байна.
Мөн АНУ-Украины хамтарсан мэдэгдэлд ашигт малтмал, газрын ховор элементийн гэрээг “аль болох түргэн хугацаанд” байгуулах тал дээр зөвшилцөлд хүрсэн болохыг дурдсан байна. АНУ-ын ерөнхийлөгч Д.Трамп уг гэрээг байгуулах шахалтыг Украины талд ч, өөрийн дипломатчдад ч үзүүлсээр байгаа юм.
Д.Трамп хоёр талын уулзалтын дараахан сэтгүүлчдэд мэдэгдэл хийхдээ Оросын талд дээрх саналыг хүргэж, В.Путиныг хүлээж авна гэдэгт итгэж байгаагаа илэрхийлээд, лхагва гарагт Америк, Оросын дипломатчид уулзаж магадгүй, мөн энэ долоо хоногт В.Путинтэй утсаар ярина гэж бодож байгаагаа хэлсэн байна. Түүнчлэн Украины ерөнхийлөгч В.Зеленскийг ахин Цагаан ордонд урихаар төлөвлөж байгаагаа хэлжээ.
Харин Украины ерөнхийлөгч В.Зеленский АНУ-д талархал илэрхийлж, гал зогсоох саналыг энхийг тогтооход гарч буй “эерэг” ахиц дэвшил хэмээн тодорхойлж, сарын хугацаанд гал зогсоох саналыг хүлээж авч байгаа гээд АНУ-ыг дээрх саналыг ОХУ-ын ерөнхийлөгч В.Путинээр зөвшөөрүүлэхийг уриалж, “үр бүтээлтэй яриа хэлэлцээ өрнүүлсэн явдалд” АНУ-ын ерөнхийлөгч Д.Трампад баярлаж, талархаж байгаагаа илэрхийлсэн байна. Украины ерөнхийлөгч мөн олзны цэрэг болон хүүхдүүдийг суллаж солилцох зэргээр “бодит итгэлцлийн арга хэмжээ авах”-ыг уриалж, Украин улс энхийг тогтооход бэлэн байгааг илэрхийлээд, одоо ОХУ бэлэн байгаа гэдгээ харуулах ёстой гэжээ.
АНУ-Украины хамтарсан мэдэгдэлд мөн Киевийн зүгээс аливаа энхийн яриа хэлэлцээнд Европыг оролцуулах ёстой гэсэн байр сууриа ахин илэрхийлснийг дурдсан бол Европын Комиссын ерөнхийлөгч Урсула фон дер Лейен мягмар гарагийн уулзалтаас гарсан эерэг ахиц дэвшлийг ЕХ сайшаан хүлээн авч байгаагаа мэдэгджээ.
Харин АНУ-Украины уулзалтын талаар Москвагийн зүгээс хараахан байр сууриа илэрхийлээгүй байна. ОХУ-ын ГХЯ-ны хэвлэлийн төлөөлөгч Мариа Захарова ОХУ ойрын өдрүүдэд АНУ-ын төлөөлөгчидтэй яриа хэлэлцээ явуулах асуудлыг үгүйсгээгүй талаар Оросын төрийн өмчит ТАСС мэдээллийн агентлаг мэдээлжээ. Зарим эх сурвалжуудын мэдээлснээр Америк-Украины уулзалтад оролцсон АНУ-ын ерөнхийлөгчийн Ойрхи Дорнодын асуудал хариуцсан тусгай элч төлөөлөгч Стив Уиткофф ойрын өдрүүдэд ОХУ-ыг зорино гэж байгаа ч энэ баттай мэдээлэл биш юм.
Ийнхүү Орос, Украины зөрчилдөөнийг төгсгөх асуудлаарх яриа хэлэлцээ явагдаж байх зуур мягмар гарагт дайтагч талууд харилцан дроны довтолгоо үзүүлсэн байна. Украины дайн эхэлснээс хойш Оросын нийслэл хотод үзүүлсэн хамгийн том дроны цохилтын улмаас Москва хотын орчимд 3 амь үрэгдэж, 18 хүн шархдсаны дотор 3 хүүхэд багтсан талаар Оросын хэвлэлүүдээр мэдээлжээ. ОХУ-ын батлан хамгаалах яамнаас 337 дроныг агаарт амдан устгаснаас 91-ийг нь Москва орчимд буудан унагасан хэмээн мэдэгдсэн байна.
Украины талаас ч мөн нийслэл Киев болон бусад мужууд Оросын дроны цохилтод өртсөнийг мэдээллээ. Украины агаарын хүчний зүгээс мэдэгдсэнээр Оросын 126 дроны 79-ийг нь буудан унагаснаас гадна Оросын талаас Искандер-М загварын баллистик пуужингаар харвасныг мэдээлсэн байна.