Японы нийслэл Токио хотноо орон нутгийн цагаар мягмар гарагийн өглөө шууд дамжуулалт (live stream) хийж байсан эмэгтэйг гудамжинд удаа дараа хутгалан хөнөөсөн хэрэг гарчээ.

22 настай Сато Аири гэгч эмэгтэйг 42 настай эрэгтэй Токио хотын Шинжүкү дүүргийн Такаданобаба орчимд шууд бичлэг хийж байх үеэр нь ирж удаа дараа хутгалж, аминд нь хүрсэн бөгөөд мөрдөгчдийн мэдээлснээр эмэгтэйн толгой, хүзүү, гэдсэн тус газруудад хутгалсан байсан гэжээ. Хохирогч эмэгтэйг түргэн тусламжаар эмнэлэгт хүргэсэн даруйд нас барсан байна.

Цагдаа нар хэргийг үйлдсэн эрэгтэйг газар дээр нь баривчилсан ба түүнийг Токиогоос хойд зүгт байрладаг Точиги мужийн Ояма хотын оршин суугч Такано Кеничи гэгч болохыг олж тогтоосон байна.

Токио хотын цагдаагийн газраас тухайн эрэгтэйг үзэн ядалтаас үүдэн уг хүн амины хэргийг үйлдсэн гэж үзэн, мөрдөн шалгах ажлыг явуулж байна. Такано Кеничи цагдаа нарт мэдүүлэг өгөхдөө хохирогч эмэгтэйд зээлдүүлэх зорилгоор санхүүгийн байгууллагаас 2 сая иен зээлж өгсөн боловч түүнд буцааж төлөөгүй гэжээ.

Дээрх мөнгийг хохирогч эмэгтэйн гар утасны төлбөр болон бусад хэрэглээний зардлуудыг төлөх зорилгоор зээлдүүлсэн боловч зээлсэн мөнгөө эргүүлж төлөөгүй учраас уг хэргийг үйлдсэн боловч бүсгүйг алах зорилго агуулаагүй хэмээн мэдүүлжээ. Мөн бүсгүй түүнээс хамаатан саднуудынхаа хэрэглээний зардлыг төлөх зорилгоор ахиад мөнгө зээлдүүлэхийг гуйсан тухай мэдүүлсэн байна.

Хүн амины хэргийн сэжигтэн Такано бүсгүйд зээлдүүлсэн мөнгөө эргүүлж авах зорилгоор өнгөрсөн оны 1-р сард өөрийн амьдардаг Точиги мужийн цагдаагийн газарт гомдол гаргаж байсан талаар мөрдөгчид мэдээлжээ.

Такано Кеничи нь мэдүүлэгтээ хохирогч бүсгүйг ээлжит шууд бичлэгээ хийх газраа зарласны дараагаар тухайн газарт нь очиж, шууд бичлэгээс нь түүний байршлыг олж халдсан гэдгээ мэдүүлсэн байна.