Өдөр бүр нийтийн тээврийн үйлчилгээнд 1000 гаруй автобус явж, иргэдэд үйлчилдэг. Тэгэхээр 1000 гаруй хүн жолооны ард иргэдийн амь нас эрүүл мэндийг давхар хариуцан яваа гэсэн үг. Шөнийн гурав, дөрвөн цагт гэрээсээ гардаг тэдний эрүүл мэнд дээсэн дөрөөн дээр байдгийг гуравхан хоногийн өмнө болсон харамсалтай явдал батлан харууллаа. Дахин сануулбал, 2025.03.10-ны өдөр нийтэд үйлчилж байсан автобусны жолооч эрэгтэй /38 настай/ жолооныхоо ард, суудал дээрээ амиа алдсан байдалтай олдсон. Түүний зүрх гэнэт зогссон гэх мэдээлэл гараад байна. Уг явдлыг цагдаагийн байгууллага шалгаж буй юм.

Нийтийн тээврийн автобусны жолооч ажлын байрандаа амиа алдана гэдэг бол зөвхөн жолоочийн тухай асуудал биш. Түүний цаана олон хүний амь, эрүүл мэнд бий. Энэ удаад зорчигчдод аюул учраагүй ч цаашид учрахгүй гэх баталгаа алга байгааг энэ явдал харууллаа.

Улаанбаатарын түгжрэлд өдөржин жолооны ард гацаж, уур бухимдалтай иргэдийн амны зугаа болдог автобусны жолооч нарт буугаад бие засах газар байдаггүй. Тайван суугаад хоол идэх цаг байдаггүй нь эмгэнэлтэй.

“Ихэвчлэн ширхгийн хоол иддэг. Бие засах газар олддоггүй учраас бүтэн өдөржин юу ч идэхгүй явах үе бий гэж автобусны жолооч эмэгтэй хэлж байсан юм.

Иргэдийг нийтийн тээврээр зорчиход хамгийн чухал үүргийг жолооч нар гүйцэтгэдэг. Тэд зөвхөн жолооны ард суух бус автобусаа цэвэрлэх, шал шавхайг нь угаахаас авахуулаад, хийх ажил мундахгүй. Гэвч тэдний эрүүл мэндэд тухайн байгууллага нь хэрхэн анхаардаг талаар тодрууллаа.
Энэ талаар автобусны жолооч эмэгтэй Б.Хашдарь-Эх: Автобусны жолооч нарын дунд нас баралт маш их байгаа. Миний эргэн тойрны нэлээн олон хүн нас барьсан. Зарим нь унтаад сэрсэнгүй гээд л … Зарим нь ажлаасаа тарж яваад, гэнэт зүрх нь хаагдчихсан гэдэг. Яагаад, юунаас болоод байна гэхээр стресс бухимдал, хөдөлгөөнгүй өдөржин суудаг нь их нөлөөлдөг юм билээ. Өдөржин жолооны ард хөдөлгөөнгүй сууснаар даралт их өндөр болдог гэсэн. Тэгээд хоол унд идэх завгүй байдаг учраас ширхгийн хоол идэж явсаар, ходоод, нойр булчирхай өвддөг.
Автобусны жолооч А: Өглөө ажилдаа гарахад техникийн аюулгүй байдал, архи уусан эсэхийг л шалгадаг. Бусдаар цусны даралт, зүрхний цохилт шалгадаггүй. Өмнөх зун жолоо барьж явах үед гэнэт толгой эргээд, нүд сонин болоод эхэлсэн. Гэтэл даралт ихэссэн байсан. Хүн ихтэй, халуун байдаг учраас бүгчимдэх, хэт их уурлаж, бухимдсанаас болдог байх л даа. Хүн өөрийнхөө биеийн байдал, даралт ихсэж, багасаж байгааг мэдэхгүй. Тэгэхээр өглөө ажилд гарахаас өмнө бидний биеийн байдлыг үздэг байвал сайн хэрэг шүү дээ.
Автобусны жолооч Н: Манай баазад өглөө болгон ажилд гарахаас өмнө эмч ирж шалгадаг. Биеийн байдал ямар байгааг үздэг. Харин зарим жолооч өөрсдөө “Миний бие зүгээр” гээд үзүүлэхгүй гараад явчихдаг” гэв. Жолооч нарын төлөөлөл ярилаа.
Автобусны жолооч нар өндөр цалин авдаг, тэтгэвэрт гарахдаа 100 саяын тэтгэмж авдаг гэж хотын дарга хэлсэн. Гэхдээ цалин хөлс, тэтгэмж ярихаас урьтаж, монгол хүний амь нас, эрүүл мэндийн асуудлыг ярьдаг болмоор байна.
Жолооч нараа өглөө гараанд гарахаас өмнө биеийн байдлыг шалгаж, жолоо барих хэмжээнд байна уу, үгүй юү, энэ хүний биед ямар нэг асуудал байгаа юу гэдэг наад захын үзлэг хийдэг байх нь аль аль талдаа хэрэгтэй, заавал хэрэгжүүлэх ёстой арга хэмжээ юм.