Пүрэв гарагт Олон Улсын Олимпын Хорооны шинэ ерөнхийлөгчийг сонгох санал хураалт явагдаж, дүнгээ гаргалаа.
Олимпын эх өлгий болсон Грек улсын Олимпиа хотод явагдсан санал хураалтын дүнгээр Зимбабве улсын Олимпын хошой аварга, усанд сэлэлтийн тамирчин Кирсти Ковентри ялалт байгуулж, ОУОХ-ны 10 дахь ерөнхийлөгчөөр сонгогдоод байна.
К.Ковентри ОУОХ-ны гишүүдийн цахимаар болон нууц санал хураалтаар өгсөн нийт 97 саналын 49-ийг нь цуглуулснаар тус байгууллагын ерөнхийлөгчийн сонгуулийн эхний шатанд үнэмлэхүй ялалтыг байгуулж, бусад 6 нэр дэвшигчдээ илт давуу байдлаар ялан сонгогдсон байна.
Түүнтэй өрсөлдсөн Хуан Антонио Самаранч Жуниор 28 санал, Их Британийн нэр дэвшигч Лорд Себастьян Ко 8 санал, Францын нэр дэвшигч Дэвид Лаппарьен, Японы нэр дэвшигч Моринари Ватанабе нар тус бүр 4 санал, Йорданы хунтайж Фейсал аль Хуссейн, Шведийн нэр дэвшигч Йохан Элиас нар тус бүр 2 санал авчээ.
Тэрээр энэхүү албан тушаалыг хашихаар болсон анхны эмэгтэй болон анхны Африкийн бүс нутгаас гаралтай хүнээр тодорсон түүхэн үйл явдал боллоо. Түүнчлэн 130 жилийн түүхтэй ОУОХ-ны 130 жилийн түүхэн дэх хамгийн залуу тэргүүнээр тодроод байна. Тэрээр тус байгууллагыг сүүлийн 12 жилийн турш Томас Бахын халааг авахаар болж байна.
Өдгөө 41 настай Кирсти Ковентри сурталчилгааны кампанит ажлынхаа үеэр тамирчдад дэмжлэг үзүүлэх системийг сайжруулах, эмэгтэйчүүдийн спортын төрлийг дэмжих, Олимпын залуу үзэгчдийн тоо хэмжээг нэмэгдүүлэх зэрэг мөрийн хөтөлбөртэй оролцсон ажээ.
К.Ковентри 2004 оны Афины, 2008 оны Бээжингийн Олимпын наадмаас 200 метрийн араар даллах сэлэлтийн төрөлд тус бүр алтан медаль хүртэж байсан бол одоогийн байдлаар тэрээр Зимбабве улсын Спортын сайдын албыг хашиж байгаа юм.
ОУОХ-ны ерөнхийлөгчийн сонгуульд ялалт байгуулаад байгаа Кирсти Ковентри ирэх 6 дугаар сард албан ёсоор албан тушаалаа хүлээж авах бөгөөд тэрээр уг албан тушаалд 8 жилийн хугацаанд хаших болно.
Тэрээр ялалт байгуулсныхаа дараа хэлсэн үгэндээ “цорын ганц эмэгтэй нэр дэвшигч сонгогдсон явдлыг би хувьдаа маш хүчтэй дохио гэж үзэж байна, энэ нь ОУОХ олон талт байдалд нээлттэй олон улсын байгууллага болон хөгжсөн гэдгийг харууллаа, ирэх найман жилийн хугацаанд ч мөн энэ замаараа үргэлжлэн хөгжих болно” гэжээ. Мөн тэрээр түүнтэй хамт өрсөлдсөн нэр дэвшигчидтэй хамтран ажиллахаа мэдэгдсэн байна.
Түүний хувьд хамгийн эхний зохион байгуулах Олимпын наадам нь ирэх оны 2-р сард Итали улсад зохиогдох хуваарьтай 2026 оны Милан-Кортинагийн Өвлийн Олимпын наадам юм. Үргэлжлээд түүнийг 2028 оны Лос Анжелесын зуны Олимпын наадам хүлээж байгаа ба түүнээс өмнө тэрээр Орос-Украины дайн хэрхэн шийдэгдэх, геополитикийн нөхцөл байдал хаашаа эргэхээс шалтгаалж ОХУ-ын эсрэг тавьсан ОУОХ-ны хоригийг цуцлах эсэх асуудлыг шийдэхээс гадна мөн АНУ-д зохиогдох Олимпод оролцох тамирчдын виза, трансжендер тамирчдын асуудал зэргийг тус улсын ерөнхийлөгч Д.Трамптай хэлэлцэх олон асуудлууд түүнийг хүлээж байна.