E-Mongolia системээр хүн бүр донор болох хүсэлтээ өгөх боломжтой. Тэгвэл УИХ-ын гишүүдээс донор болох эсэхийг нь лавлалаа.

УИХ-ын гишүүн  О.Батнайрамдал: Хувь хүний сонголт  л доо. Миний хувьд донор болоход бэлэн. Хэрвээ миний эд эрхтэн хэн нэгэнд дараа нь хэрэг болдог юм бол, хэн нэгэнд амь хайрлах юм бол энэ чинь маш том  буян гэж бодож байна. Олон улсын жишиг ч бий. Бүх орон иргэдээсээ донор болох эсэхийг нь асуудаг. Сонголтоо иргэн өөрөө хийнэ. Үүнийг дагаад эдийн засгийн шинжлэх ухааны их том бодлого  явдаг л даа.

 УИХ-ын гишүүн  Г.Дамдинням: Би бол зөвшөөрье гэсэн бодолтой явж байдаг юм. Гэхдээ E-Mongolia-руу орж хараагүй байна. Өндөр хөгжилтэй улс оронд байдаг л асуудал. Миний сурч байсан Канад улсад байдаг л зүйлд тооцогддог. Ер нь бол хүн бүр энэ хорвоод байж байгаад л буцацгаана шүү дээ. Бүгдээрээ ялгаагүй. Тийм учраас 1 ч гэсэн хүнд буян болох юм сан гэдэг агуулгаар шийддэг асуудал. Гэхдээ тухайн хүний сонголт нь  гэр бүлийн соёл, шашин шүтлэг зэргээсээ хамаарч шийддэг учраас улс төрчид оролцох боломжгүй. Хууль эрх зүйн орчныг нь л тодорхой болгох нь чухал. Хүн өөрөө сонгож болдог, үгүй гэж хариулж болдог л байх учиртай.  

УИХ-ын гишүүн Т.Аубакир: Яагаад болохгүй гэж? Донор болох, цусаа донорын төвд хандивлах гэдэг тухайн хүний өөрийнх нь эрх. Болох л асуудал. Нэг талдаа сайн зүйл юм биш үү? Яг хэрэгтэй хүндээ миний өгсөн цус таарч байвал би өгөхөөс татгалздаггүй. Өгч л явсан. Би зөв гэж боддог.

УИХ-ын гишүүн Ж.Батжаргал: Ер нь зөв шүү дээ. Би бол тэгж л ойлгодог. Үнэхээр бусдад хэрэгтэй зөв зүйл байгаа бол түүнээс татгалзах шаардлагагүй. Гэхдээ шийдэл гаргах нь тухайн хүний өөрийн сонголт гэж боддог. Би бол донор болохыг зөвшөөрнө.