Ням гарагт АНУ-Украины яриа хэлэлцээ Саудын Арабын нийслэл Эр Рияд хотноо зохион байгуулагдаж өндөрлөлөө.

Талуудын энэ удаагийн уулзалт өнгөрсөн долоо хоногийн лхагва гарагт АНУ-ын ерөнхийлөгч Д.Трамп, Украины ерөнхийлөгч В.Зеленский нар утсаар холбогдон ярилцаж, тохиролцсоны дараа хийгдэж байгаа уулзалт юм.

ОХУ-ын Украинд халдан довтолж, 3 жил гаруй хугацаанд үргэлжилж байгаа дайныг зогсоох үүднээс АНУ-ын зуучилж буй яриа хэлэлцээ үргэлжилсээр байгаа бөгөөд Саудын Араб улсад зохиогдсоор байгаа талуудын уулзалтаас гарах ахиц шийдвэр, үр дүнг дэлхий нийтээгээр нүд чих тавин ажиглаж хүлээсээр байна.

АНУ-Украины ээлжит уулзалтын талаар Украины батлан хамгаалахын сайд Рустем Умеров ням гарагт өөрийн нийгмийн сүлжээн дэх хуудсаараа дамжуулан мэдээллээ.

Тэрээр Америкийн талтай хийсэн яриа хэлэлцээ үр бүтээлтэй, нарийн ширийн асуудлууд дээр нэлээд төвлөрч явагдсаныг онцолж, “эрчим хүч гэх зэрэг гол чухал асуудлуудыг хөндсөн” гэжээ.

Р.Умеров мөн Украин улс “өнө мөнхийн энх тайвныг тогтоох зорилгоо бодит явдал болгох тал дээр ажилласаар байгаа” гэдгийг нэмж хэлсэн байна.

Украин улс АНУ-ын тавьсан 30 хоног гал зогсоох болон эрчим хүчний дэд бүтцүүдэд хэсэгчлэн гал зогсоох саналуудыг аль алийг нь хүлээн зөвшөөрөөд байгаа хэдий ч ням гарагийн уулзалтыг цэвэр техникийн шатны яриа хэлэлцээ гэж харж байгаа байр сууриа мөн илэрхийлжээ.

Одоогоор АНУ-Украины уулзалтын талаар дэлгэрэнгүй мэдээлэл хараахан гараагүй байна.

Үргэлжлээд өнөөдр АНУ-Оросын яриа хэлэлцээ Саудын Араб улсад явагдах болно. Кремлийн зүгээс ням гарагт мэдэгдсэнээр энэ удаагийн уулзалтаар Хар тэнгисээр Украины улаан буудайг аюулгүй чөлөөтэй нэвтрүүлэх санаачилгыг дахин сэргээх асуудлаар голчлон ярилцах юм. Оросын төлөөлөгчид Хар тэнгисийн улаан буудайн санаачилгыг сэргээх асуудлыг хэлэлцэхэд бэлэн байгааг Кремлийн хэвлэлийн төлөөлөгч Дмитрий Песков мэдэгдсэн байна.

Хэдийгээр ийнхүү дайныг зогсоох дипомат яриа хэлэлцээ явагдсаар байгаа ч Орос, Украин улсууд байлдаанаа үргэлжлүүлсээр байгаа юм. Бямбаас ням гараг шилжих шөнө Оросын тал Украины нийслэл Киев руу томоохон хэмжээний дроны довтолгоо үзүүлснээр наад зах нь 3 хүн амь үрэгдсэний дотор 5 настай хүүхэд амиа алдаж, олон байшин барилгууд шатсан талаар Украины албаныхан мэдээлжээ. Түүнчлэн Оросын баруун өмнөд бүс нутгийн хотуудыг онилсон Украины дроны довтолгооны үеэр Оросын агаарын хамгаалах систем 59 дроныг устгасан бөгөөд Украины цохилтын үеэр Ростов хотод нэг хүн амь үрэгдсэн талаар ОХУ-ын албаныхны зүгээс ням гарагт мэдээлсэн байна.