“Монгол Улсын нутаг дэвсгэрээр дамжин өнгөрөх болон түр хугацаагаар орж ирж байгаа авто тээврийн хэрэгсэл эзэмшигч, өмчлөгчийг жолоочийн даатгалд хамруулах журам”-д Хууль зүй, дотоод хэргийн яам, Санхүүгийн зохицуулах хороо, Хил хамгаалах ерөнхий газар хамтран өөрчлөлт оруулж, “Хилийн боомтод даатгалын зуучлалын үйл ажиллагаа явуулах компанийг сонгон шалгаруулах журам”-ыг хүчингүй болголоо. Хилийн бүсэд Жолоочийн даатгалын тухай хууль хэрэгжүүлэхтэй холбоотой зохицуулалтыг сайжруулах, даатгалын хүртээмжийг нэмэгдүүлэх, даатгуулагч, хохирогчийн эрх ашгийг хамгаалах зорилгоор ийм зохицуулалт хийжээ.

Хилийн бүсэд даатгалын ганцхан зуучлагч ажиллах хязгаарлалтыг үүгээр халав. Сонгон шалгаруулалт зарлалгүйгээр тухайн боомтод ажиллах хүсэлт гаргасан аливаа даатгалын зуучлагч компани холбогдох хууль тогтоомжийн дагуу Хил хамгаалах ерөнхий газраас зөвшөөрөл авч, даатгалын зуучлалын үйл ажиллагаа эрхлэх боломж бүрдэж байна. Үүнээс гадна тухайн зуучлагч компани даатгалын хэд хэдэн компанийг төлөөлөн ажиллахаар болж байгаа аж. Энэ шаардлагыг дээрх журамд тусган, холбогдох зохицуулалт бий болгожээ.

Ингэснээр Монгол Улсын нутаг дэвсгэрээр дамжин өнгөрөх, түр нэвтэрч байгаа гадаад улсын авто тээврийн хэрэгслийн эзэмшигч, өмчлөгч нарыг хилийн бүсэд жолоочийн хариуцлагын албан журмын даатгалд бүрэн хамруулах нөхцөл бүрдэх, улмаар Монгол Улсын нутаг дэвсгэрт байх хугацаанд зам тээврийн осол гаргаж, иргэдийн амь нас, эрүүл мэнд, эд хөрөнгөд хохирол учруулсан тохиолдолд хохирлыг нөхөн төлөх, хохирогчдын эрх ашиг хамгаалагдах ач холбогдолтой. Түүнчлэн энэхүү өөрчлөлтийн үр дүнд хилийн бүс, зурваст ажиллах зөвшөөрөл авах шат дамжлага болон төрийн оролцоо буурах, хилийн бүс дэх даатгалын хүртээмж нэмэгдэх зэрэг давуу талтай юм байна.