Монгол улсын банкны системийн хэрэглээний зээлийн үлдэгдэл 2024 оны эцсийн байдлаар 11.4 их наяд төгрөгт хүрчээ. Энэ нь 2023 оны мөн үеийнхээс 35.5 хувиар нэмэгдсэн үзүүлэлт юм. Үүний 23.7 нэгж хувийг цалингийн зээл, 5.3 нэгж хувийг тэтгэврийн зээл бүрдүүлсэн байна. Амьжиргааны суурь зардлаа хангахын тулд сарын орлогынхоо 48 хувиас багагүй хэсгийг дундаж өрхийн хувьд хэрэглээндээ зарцуулах тооцоолол байдаг. Гэвч зээлдэгчид өр орлогын харьцааны дээд хязгаарыг тулгаж буюу 55 хувьд хүргэх хандлагатай болжээ. 

Мөн тэтгэвэр авагч иргэдийн 53.2 хувь нь тэтгэврийн зээлтэй иргэд эзэлж байгаа бөгөөд эдгээр иргэдийн өр орлогын харицаа алдагдаж 84 хувьд хүрсэн байна.

Тэтгэврийн зээлтэй иргэдийн зээлийн төлбөрийн дарамт харьцангуй өндөр, зээлээ төлж дуусахаас өмнө зээлийн гэрээнд өөрчлөлт оруулан нэмж зээл авах хандлагатай болжээ. Иймээс банкнаас иргэдэд шинээр олгох болон нөхцөлийг нь өөрчлөх тэтгэвэр, тэтгэмжийн орлого барьцаалсан зээлийн хувьд зээлийн сарын төлбөрөө төлсний дараах зээлдэгчийн үлдэх орлого нь амьжиргааны доод түвшнээс доошгүй байхаар тогтоох шаардлага тавьж байх асуудал яригдаж байгаа аж.

Цалингийн өсөлтөөс шалтгаалан иргэдийн зээл авах боломжит хэмжээ нэмэгдэж байгаа нь хэрэглээний зээл хэт өсөх, цаашлаад төлбөрийн тэнцэл, валютын ханшид дарамт учруулж байгаа тул зээлийн хэт өсөлтийг хязгаарлах мэдээ байна. Мөн банкны системийн зээлийг бизнесийн зээлд чиглүүлж, ажил эрхлэлтийг дэмжих, эдийн засгийн тогтвортой өсөлтийг хангах ач холбогдолтой гэж Монголбанкны мөнгөний бодлогын хорооны хурлын тэмдэглэлд дурджээ.