Металууд Азийн аваргуудын лигт түүхэн хожил авлаа


Сагсан бөмбөгийн Зүүн Азийн орнуудын клүбүүдийн лигийн тэмцээн болох “Basketball champions league Asia” тэмцээний нээлтийн тоглолтод эх орноо төлөөлөн оролцож буй “Бишрэлт Металл” баг Малайзын “Эн Эс Матрикс” багийг 98:86 харьцаагаар хожиж эхний хожлоо авлаа. Ингэснээр тэд “А” хэсгийг нэг хожилтойгоор тэргүүлж байна.

Металууд хоёрдугаар хагаст 45:40 харьцаагаар тоглолтыг тэргүүлсэн. Ингээд онооны давамгайллаа хадгалсаар эцсийн мөчид 12 онооны илүүтэйгээр талбайн эзэн Матрикс багийг буулган авсан юм. Тус тоглолтод Байрон Уэсли 34, Девон Скотт 24, А.Энхбаясгалан 21 оноо авч багаа тэргүүлэв.

Энэхүү тоглолтод “Бишрэлт Металл” багийн Т.Ууганбаяр, Н.Төмөрчөдөр нар бэртлийн улмаас оролцоогүй. Тодруулбал тоглолтын өмнөх бэлтгэл дээр Т.Ууганбаяр хамарны гэмтэл авсан бол Н.Төмөрчөдөр хөлийн бэртлээ сэдрээсний улмаас эхний тоглолтыг өнжлөө.

“Бишрэлт Металл” баг Индонезийг зорьж 4-дүгээр сарын 05-нд “Пелита Жаяа” багтай тоглоно. Үүний дараа 4 дүгээр сарын 30-нд Тайванийн “Тайён Фелос” багтай тоглох хуваарьтай байгаа юм.


Leave a Reply

Your email address will not be published. Required fields are marked *