АНУ-ын ерөнхийлөгч Д.Трамп тус улсад импортлогдон орж ирэх автомашинуудад 25%-ийн нэмэлт шинэ тарифыг ногдуулахаар болсноо лхагва гарагт албан ёсоор зарласан байна. Үүнд гадны улс орнуудад үйлдвэрлэсэн бүх автомашинууд хамрагдахаар болжээ.

Шинэ тарифын нэмэгдэл 4-р сарын 2-ноос үйлчилж эхлэх бөгөөд 4-р сарын 3-наас импортын тарифыг хурааж эхлэх болно гэдгийг Д.Трамп мэдэгдсэн байна. Түүнчлэн энэхүү импортын тарифын нэмэгдэл нь автомашинаас гадна автомашины сэлбэгүүдэд ч үйлчлэх бөгөөд гаднаас орж ирэх автомашины сэлбэгийн хураамжийг 5-р сараас авч эхлэх талаар эх сурвалжууд мэдээллээ.

АНУ-ын төрийн тэргүүн мөн гадны автомашины импортод ногдуулж буй уг тарифын нэмэгдэл байнгын хүчинтэй байх бол АНУ-ын нутаг дэвсгэрт үйлдвэрлэсэн гадны компаниудын автомашинд тариф ногдуулахгүй гэдгийг онцолжээ. Трамп хэлэхдээ, “хэрвээ машинаа АНУ-д үйлдвэрлэвэл тариф төлөхгүй” гэсэн байна.

Д.Трамп өөрийн энэхүү шийдвэрийг дотоодын автомашин үйлдвэрлэлийн салбарт “гайхалтай өсөлт”-ийг авчирч, АНУ-д хөрөнгө оруулалтыг татаж, ажлын байрыг нэмэгдүүлэх болно гэжээ.

Харин салбарын шинжээчид түүний шийдвэрийг АНУ-ын автомашины үйлдвэрлэл зогсоход хүргэж, автомашины үнэ нэмэгдэж, салбарын гадаад харилцаанд сөрөг нөлөө үзүүлэх болно гэж үзэж байна. Хэдийгээр Трампын шийдвэр дотоодын бизнесүүдийг хамгаалж байгаа мэт харагдах боловч автомашины сэлбэг, эд ангиа гаднаас авдаг Америкийн компаниудад давхар дарамт үзүүлж, автомашины үнэ ханш олон мянган доллараар нэмэгдэж, цаашлаад олон улсын автомашины худалдаа болон нийлүүлэлтийн сүлжээнд сөргөөр нөлөөлөх болно гэдгийг шинжээчид хэлж байна.

АНУ өнгөрсөн жил 8 сая орчим автомашин импортолсон нь нийт 240 тэрбум ам.доллараар хэмжигдсэн автомашины худалдааны эргэлтийн бараг тал хувийг эзэлсэн байна. Америкт автомашин экспортлогч орнуудыг өмнөд хөрш Мексик улс тэргүүлж, араас нь Өмнөд Солонгос, Япон, Канад, Герман улсууд жагсдаг байна.