Украин болон Францын ерөнхийлөгч нар пүрэв гарагт Парис хотноо зохиогдох Украиныг дэмжигч улс орнуудын чуулганы өмнө богино уулзалт явуулж, уулзалтын дараагаар хамтарсан хэвлэлийн бага хурал хийгээд байна.

Зеленский, Макрон нар хэвлэлийн бага хурлын үеэр ОХУ-ын зүгээс тавьж байгаа урьдчилсан нөхцлүүдгүй гал зогсоох тохиролцоо шаардлагатайг илэрхийлж, дайн тулаан үргэлжилж байгаа нөхцөлд ОХУ-ын эсрэг тавьсан хоригуудыг цуцлах ёсгүй гэсэн байр суурийг илэрхийлжээ.

АНУ-ын зуучилсан Хар тэнгист гал зогсоох тохиролцоог эхлүүлэхээс өмнө Оросын талаас барууны зарим хориг арга хэмжээнүүдийг цуцлахыг шаардсан мэдэгдэл хийсний дараагаар Украин, Францын ерөнхийлөгч нар дээрх мэдэгдлийг хийлээ.

Францын ерөнхийлөгч Э.Макрон гал зогсоох тохиролцооны үеэр хэрвээ Орос халдан довтолсон тохиолдолд Украины нутаг дэвсгэрт байршуулах Европын энхийг сахиулах хүчин “хариу үзүүлэх” боломжтой хэмээн хэлсэн нь мөн олон улсын анхаарлыг татаад байна.

В.Зеленский мөн АНУ-ыг ОХУ-ын ерөнхийлөгч В.Путинээр ямар ч нөхцөл, шаардлагагүй гал зогсоох тохиролцоог зөвшөөрүүлж чадна хэмээн итгэж, хүлээж байгаа гэдгээ нэмж хэлсэн байна.

Хоёр улсын ерөнхийлөгчдийн уулзалтын төгсгөлд Э.Макрон Украин улсад 2 тэрбум еврогийн шинэ зэвсгийн багц тусламжийг үзүүлэхээр болсноо албан ёсоор зарласан бөгөөд тэдний уулзалтын дараагаар Эйффелийн цамхагийг Украин улсын туг далбааны өнгөөр гэрэлтүүлжээ.

Украины ерөнхийлөгч мөн Парис хотноо Европын сэтгүүлчидтэй ярилцлага хийсэн байна. Энэ үеэр түүнээс “Түүхийн сурах бичигт хэн гэж бичигдэж үлдэх бол, Украин улсыг аварч хамгаалж үлдсэн хүн үү, эсвэл тус улсыг сүйрүүлсэн хүн үү?” гэж асуухад Зеленский “Түүхийн номд миний талаар юу гэж бичихийг би мэдэхгүй байна, тэр бол миний зорилго биш. Миний зорилго бол Украин улсыг хамгаалж, хүүхдүүд маань гудамж талбайд айж нуугдалгүй, чөлөөтэй явдаг болохыг харах. Би үхэн үхтлээ Украин улсыг хамгаалахын төлөө чадах бүхнээ хийх болно” хэмээн хариулсан байна.  

Харин Украин НАТО-д элсэх ёстой юу гэсэн асуултанд тэрээр Украин улс НАТО-г илүү хүчирхэгжүүлсэн гэдгийг онцолсон ч, Трампын засаг захиргаа Киевийн НАТО-д гишүүнээр элсэх асуудлыг зөвшөөрөөгүй гэдгийг мөн тодотгожээ.

27-ны пүрэв гарагт Парис хотноо зохиогдох Украиныг дэмжигч орнуудын эвслийн чуулганд 30 орчим улс орны төр, засгийн тэргүүнүүд ирж оролцохоор болсон байна. Энэ удаагийн чуулга уулзалтаар ирээдүйд гал зогсоох хэлэлцээрийг хадгалахын тулд Европ болон бусад улс орнууд ямар дэмжлэг үзүүлж болох талаар нэгдсэн тохиролцоонд хүрэх асуудлыг хэлэлцэх юм.