Эрчим хүчний дэд бүтцүүдэд гал зогсоох тохиролцоог үл харгалзан эрчим хүчний байгууламжуудад цохилт өгсөн талаар Орос, Украины эрх баригчид харилцан бие биенээ буруутгаад байна.

ОХУ-ын Брянск, Курск мужууд болон мөн Крымийн бүс нутгийн эрчим хүчний холбогдолтой объектуудад дроны цохилт үзүүлснийг лхагва гарагт ОХУ-ын Батлан ​​хамгаалах яам мэдэгджээ.

Тус яамны мэдэгдэлд хэдийгээр эрчим хүчний дэд бүтцэд цохилт өгөхөө зогсоохоор тохиролцсон ч Украин улс халдлага үйлдсээр байгааг мэдээлсэн байна.

Түүнчлэн ОХУ-ын ерөнхийлөгчийн хэвлэлийн төлөөлөгч Дмитрий Песков лхагва гарагт хийсэн мэдэгдэлдээ ерөнхийлөгч В.Путины эрчим хүчний дэд бүтцүүдэд цохилт үзүүлэхийг зогсоох тухай тушаал хүчин төгөлдөр үйлчилж байгаа бөгөөд зэвсэгт хүчнийхэн ч хэрэгжүүлж байгааг онцолжээ.

Тэгвэл мөн Украины талаас ч ижил мэдэгдлийг хийсэн байна. 3-р сарын 18-наас хойш эрчим хүчний 8 байгууламж Оросын халдлагад өртсөн талаар Украин улсын ерөнхийлөгчийн тамгын газрын удирдах албан тушаалтан мэдэгджээ.

Эргэн сануулахад, ОХУ 3-р сарын 18-ны өдөр АНУ-тай тохиролцож, Украины эрчим хүчний байгууламжуудад үзүүлэх цохилтоо 30 хоногийн хугацаанд зогсоохоор болсон бол 3-р сарын 19-нд Украин улс мөн ОХУ-ын эрчим хүчний дэд бүтцүүдэд 30 хоногийн хугацаанд цохилт үзүүлэхгүй гэдгээ зөвшөөрч, мэдэгдсэн билээ.