Өмнөд Солонгос улсад өнгөрсөн долоо хоногоос асч эхэлсэн ой хээрийн түймрийн улмаас амиа алдсан хүний тоо 24 болж нэмэгдсэний дотор гал сөнөөгчид ч багтжээ. Түүнчлэн 26 хүн бэртэж гэмтэн, 23 мянга гаруй хүнийг албадан нүүлгэн шилжүүлээд байна.

Ой хээрийн түймэр тус улсын зүүн өмнөд нутагт хуурай цаг агаар, хүчтэй салхины улмаас газар аван ассаар байгаа бөгөөд түймрийн улмаас амиа алдсан ихэнх хүмүүс 60-70 насны ахмад, хөгшчүүл байсныг эрх баригчид мэдээллээ.

Лхагва гаригт Хойд Гёнсан мужид асч буй түймрийг унтраах ажилд оролцож байсан нисдэг тэрэг осолдож, нисгэгч нь амь үрэгдсэн бол Өмнөд Гёнсан мужид 4 гал сөнөөгч ажил үүргээ гүйцэтгэж байгаад харамсалтайгаар амиа алдсан байна.

Өнгөрсөн долоо хоногийн баасан гарагт Санчён тойргийн орчимд дэгдсэн ой хээрийн түймэр богино хугацаанд ихээхэн хэмжээний газрыг хамран ассан бөгөөд одоогийн байдлаар 17 мянган га ойг сүйтгээд байгаа талаар эрх баригчдын зүгээс мэдээлсэн байна.

Өмнөд Солонгос улсад томоохон ой хээрийн түймэр төдийлөн гардаггүй тул энэхүү түймрийг тус улсын түүхэн дэх хамгийн их гарз хохирол учруулсан гамшиг болоод байгааг ерөнхийлөгчийн үүрэг гүйцэтгэгч Хан Доксу хэлжээ. Мөн тэрээр пүрэв, баасан гарагуудад бороо, хур тунадас орж, түймрийг унтраахад тус дөхөм болно хэмээн найдаж байгаа талаараа хэлжээ.

Ой хээрийн түймрийн эсрэг тэмцэж байгаа олон мянган гал сөнөөгчдөөс гадна 5000 цэргийн албан хаагчийг дайчилж, Өмнөд Солонгос улсад байрлах АНУ-ын цэргийн баазуудын олон арван нисдэг тэргүүдийг мөн гал унтраахад ашиглаж байгаа ажээ.