Армен улсын парламент ЕХ-нд гишүүнээр элсэж орох яриа хэлэлцээг эхлүүлэх тухай хуулийн төслийг батласан байна.

ОХУ-ын нөлөөллөөс холдож, Европыг чиглэх эхний алхам болоод буй дээрх хуулийн төслийг Арменийн парламентын лхагва гарагийн хуралдаанаар санал хураан батлажээ.

Армен улсын ерөнхий сайд Никол Пашинян мөн энэ үеэр тус улсыг ЕХ-нд гишүүнээр нэгдэж орох эсэх шийдвэрийг бүх нийтийн санал асуулгын дүнгээр гаргах ёстой гэдгийг хэлсэн байна.

Хуучин ЗХУ-ын бүрэлдэхүүнд багтаж байсан Армен улс нь ОХУ-ын тэргүүлдэг Евразийн Эдийн Засгийн Холбооны гишүүн юм.

Армен улс нь Евразийн Эдийн Засгийн Холбооны гишүүн орны хувьд ЕХ-нд гишүүнээр элсэх явдал нь зүйд нийцэхгүй гэсэн байр суурийг ОХУ-ын шадар сайд илэрхийлснийг Оросын төрийн өмчит ТАСС мэдээллийн агентлаг мэдээлжээ.

Армен нь мөн ОХУ-ын тэргүүлсэн цэргийн эвслийн гишүүн улс юм. 2023 онд Уулын Карабахын газар нутгийн маргаантай бүс нутгийн асуудлаар Азербайжантай хийсэн цэргийн мөргөлдөөнд Армен улс ялагдсан байдаг. Улмаар ОХУ-ыг аюулгүй байдлын үүргээ биелүүлээгүй хэмээн Армен улс хамтарсан цэргийн эвслээс гарах асуудлыг санал болгож байсан.