Чөлөөт, сонгомол бөхийн 2025 оны Азийн АШТ Йорданы нийслэл Амман хотноо гурав дахь өдрөө үргэлжилж байна. Тэмцээний эхний хоёр өдөр сонгомол бөхийн медальтнууд тодорсон бол өнөөдөр эмэгтэй чөлөөт бөхийн тэмцээн эхэллээ.

Өнөөдөр Монголын таван бөх барилдахаас 55 кг-д зодоглож буй Б.Отгонтуяа хагас шигшээд шалгараад байна. Тэрбээр шөвгийн наймд Казахстаны 35 настай хашир туршлагатай бөх Зульфия Яхароваг 11:0-ээр оноогоор цэвэр ялсан юм. Манай бөх эхний хоёр барилдаанд дараалж цэвэр ялахдаа нэг ч оноо алдалгүй, 21 оноо аваад байна.

Б.Отгонтуяа U-23 насны Азийн хошой аварга цолтой бөгөөд энэ жил анх удаа насанд хүрэгчдийн УАШТ-д түрүүлж, тивийн аваргад оролцох эрхээ авсан юм.

Харин хамгийн хөнгөн 50 кг-д зодоглож буй улсын аварга Б.Мөнхнар эхний даваанд БНХАУ-ын залуу тамирчин, 20 хүртэлх насны дэлхийн аварга Юү Жанд 10:0 оноогоор ялагдлаа. Хэрэв Хятадын бөх финалд шалгарвал Б.Мөнхнар дагаж барилдах болно.

Өнөөдөр мөн Т.Алтжин (59 кг), Э.Дэлгэрмаа (68 кг), Э.Даваанасан (76 кг) нар барилдах хуваарьтай байна.