Австрали улсын холбооны сонгууль буюу парламентын сонгууль 5-р сарын 3-ны өдөр явагдахаар болсныг тус улсын ерөнхий сайд Энтони Албанез нийслэл Канберра хотноо баасан гарагийн өглөө албан ёсоор зарлан мэдэгдлээ.
Энэ нь тус улсын парламентын 48 дахь удаагийн сонгууль бөгөөд сонгуулиар парламентын доод танхим болох төлөөлөгчдийн танхимын бүх 150 суудал болон дээд танхим болох Сенатын 76 суудлын 40 суудлын төлөө улс төрийн нам, эвслүүд, бие даан нэр дэвшигчид өрсөлдөх юм.
2022 оны сонгуульд ялалт байгуулсан Австралийн ерөнхий сайд, эрх баригч Хөдөлмөрийн намын дарга Энтони Албанезын хувьд дахин сонгогдох зорилгыг тавьж сонгуульд оролцохоор болоод байгаа бол түүний хамгийн том өрсөлдөгчөөр сөрөг хүчний Либерал болон Үндэсний намуудын эвслийн тэргүүн Питер Паттон нэрлэгдэж байна.
Өмнөх 2022 оны сонгуулиар Хөдөлмөрийн нам төлөөлөгчдийн танхимд 77 суудал авснаар 9 жил сөрөг хүчний үүргийг гүйцэтгэснийхээ дараа засгийн эрхийг авч байсан бол Либерал болон Үндэсний намуудын эсвэл 58 суудал авсан юм.
Ерөнхий сайд Энтони Албанез баасан гарагийн өглөө сонгуулийг товыг зарласан мэдэгдэлдээ мөн ирэх гурван жилд амьжиргааны өртгийг бууруулж, татварын хэмжээг хамгийн бага хувь хэмжээгээр нэмэгдүүлж, гэрээр явж үзэх эмчийн үнэгүй үзлэг үйлчилгээний тоог нэмэгдүүлэх гэх зэрэг амлалтуудыг өгч, түүний өрсөлдөгч Питер Даттоныг сонгосон тохиолдолд улс орны хөгжлийг ухраах болно хэмээн хэлсэн байна.
Э.Албанезыг ерөнхий сайдаар ажилласан сүүлийн 3 жилд төв банкнаас бодлогын хүүг 12 удаа нэмэгдүүлж, ердөө ганцхан удаа буулгажээ.
Харин сөрөг хүчний тэргүүн Питер Даттоны хувьд өнөөгийн засгийн газрыг австраличуудын амьдралыг сайжруулж чадаагүй хэмээн буруутгаж, үүний гарц шийдэл түүний намд байгаа хэмээн мэдэгдсээр байгаа юм. Тэрээр шатахуун түлшний үнийг буулгаж, дотоодын эрчим хүчний аюулгүй байдлыг бэхжүүлж, төрийн албыг хумиж, Австралийн эдийн засгийг сэргээснээр улс орноо “буцаад хөл дээр нь босгож, зөв замд нь оруулна” хэмээн мэдэгдсэн байна.
Австраличуудын хувьд энэ удаагийн сонгуулиар сонголтоо хийхэд тэнгэрт хадаад байгаа байшин, орон сууц, хэрэглээний бараа бүтээгдэхүүний үнэ ханш, эрүүл мэндийн үйлчилгээ, олон тоогоор ирж буй цагаачид болон гэмт хэргийн гаралтыг бууруулах асуудал, уур амьсгалын өөрчлөлтийн эсрэг үйл ажиллагаа зэрэг асуудлууд хамгийн чухалд тооцогдож байгаа гэнэ.
Австралийн улс төрийн ертөнцийн өрсөлдөөн голцуу Хөдөлмөрийн нам болон Либерал-Үндэсний эвслийн хооронд явагддаг бөгөөд 150 суудалтай төлөөлөгчдийн танхимд 76 болон түүнээс дээш суудал авсан тохиолдолд ялалт байгуулж, засгийн газрыг байгуулдаг байна.
Сүүлд явуулсан судалгаагаар дээрх хоёр нам, эвслийн аль нь ч энэ удаагийн сонгуулиар ялалт байгуулж магадгүй буюу маш бага зөрүүгээр ялалт байгуулах бөгөөд хүч нь нэмэгдсээр байгаа жижиг намуудтай эвслийн засгийн газар байгуулж ч магадгүй гэсэн таамаг дүн гарчээ.