Пүрэв гарагт Францын ерөнхийлөгч Э.Макроны зохион байгуулсан Украиныг дэмжигч улс орнуудын чуулган Парис хотноо зохион байгуулагдлаа. Уг арга хэмжээнд Украины ерөнхийлөгч В.Зеленский болон Европын 30 орчим улс орны төр засгийн удирдагчид, олон улсын байгууллагын төлөөлөгчид оролцсон байна.

Уулзалтын үеэр хэлэлцсэн гол асуудал Киевт үзүүлэх дэмжлэг туслалцаа болон мөн Орос, Украины хооронд байгуулагдах гал зогсоох тохиролцооны үеэр энхийг сахиулах үүднээс Европын цэргийг Украинд буулгаж, байршуулах асуудал байлаа.

Хоёр улсын хооронд гал зогсоох тохиролцоонд хүрсний дараа Франц болон Их Британи улсуудаас санал болгож байгаа Украинд цэрэг илгээх асуудлыг хэлэлцээд, ойрын өдрүүдэд цэрэг илгээж байршуулах төлөвлөгөөний асуудлаар Франц, Британийн хамтарсан багийг илгээнэ гэдгийг Францын ерөнхийлөгч Э.Макрон мэдэгджээ.

Тэрээр мөн чуулганы өмнө лхагва гарагт хийсэн мэдэгдэлдээ Европын цэргийг галын шугамын бүсэд биш, харин стратегийн нөөц байдлаар буюу Оросын зүгээс ирэх шинэ халдан довтолгооноос сэргийлэх үүднээс галын шугамын ард байршуулах болно гэдгийг онцолсон юм.

Гэсэн хэдий ч Европын энэхүү Украинд цэрэг илгээж байршуулах төлөвлөгөөг АНУ зөвшөөрч дэмжих эсэх, дайтагч талуудын хооронд зуучлах үүрэг гүйцэтгэж байгаа Америкийн бодлоготой ямар уялдаа холбоотой байх, нийцэх эсэх нь одоогоор тодорхойгүй байна. Тэр ч бүү хэл Европын улс орнууд Франц, Их Британийн энэхүү саналыг санал нэгтэйгээр дэмжих эсэх нь ч мөн тодорхойгүй байна.

Украины ерөнхийлөгч В.Зеленский чуулганы дараа хийсэн мэдэгдэлдээ “Оросын эсрэг авч хэрэгжүүлсэн хоригуудыг цуцлах нь маш аюултай гэдэг дохиог бид аваад байгаа” гэдгийг онцлоод, ОХУ-ын ерөнхийлөгч В.Путин шууд яриа хэлэлцээ явуулахад бэлэн биш байгааг хэлж, эсрэгээрээ өөрийгөө ямар ч төрлийн яриа хэлэлцээ явуулахаас айхгүй гэдгээ нэмж хэлсэн байна. Э.Макрон ч мөн Оросын эсрэг зарим хориг арга хэмжээг цуцлах цаг нь болоогүй гэдэг дээр чуулганд оролцогчид бүгд санал нэгдсэн болохыг мэдэгджээ.

АНУ Хар тэнгист гал зогсоож, аюулгүй зорчих тал дээр ОХУ болон Украин улсуудтай тохиролцоонд хүрсэн талаар энэ долоо хоногийн мягмар гарагт Цагаан Ордноос мэдэгдсэн. Тус мэдэгдэлд тохиролцооны дагуу Оросын зарим бараа бүтээгдэхүүнийг олон улсын зах зээлд гаргах тал дээр тусламж үзүүлнэ гэсэн бол Москвагийн зүгээс Хар тэнгист гал зогсоох тохиролцоог хэрэгжүүлж эхлэхээс өмнө Оросын эсрэг тавьсан зарим хориг арга хэмжээг цуцлах тодорхой нөхцлүүдийг хангасан байх ёстойг онцолсон билээ.