Канадын Ерөнхий сайд Марк Карни худалдааны асуудлаар нийслэл Оттава хотноо зохиогдсон кабинетын хуралдааны дараа сэтгүүлчдэд хийсэн мэдэгдэлдээ “Хоёр талын эдийн засгийг интеграцжуулж, аюулгүй байдал, батлан хамгаалах, цэрэг зэвсгийн салбарын хамтын ажиллагааг гүнзгийрүүлэхэд суурилсан АНУ-тай харилцаж байсан хуучин харилцаа дууссан” гэжээ.

Тэрээр АНУ-ын Ерөнхийлөгч Д.Трампын тарифын бодлоготой холбогдуулан, Канад улсын дотоодын эдийн засгийг уг үндсээр нь дахин авч үзэх шаардлагатай болоод байгааг онцолсон байна. Марк Карни АНУ-д “томоохон сөрөг нөлөө” үзүүлэх хариу тариф тогтоох болно хэмээн мэдэгдлээ.

“Канадчууд өөрсдөө бүрэн хянах боломжтой эдийн засгийг байгуулах ёстой. Ингэхийн тулд бусад түнш, хамтрагч улс орнуудтай хийж байгаа худалдааны харилцаагаа ахин бодолцож, шинэчлэх хэрэгтэй” хэмээн Марк Карни хэлсэн байна.

Д.Трамп лхагва гарагт бүх төрлийн импортын автомашин болон сэлбэг, эд ангид 25%-ийн тариф тогтоохоор болсныг зарласан. Тэгвэл М.Карни 1965 оны Канад-Америкийн автомашины бүтээгдэхүүний гэрээг хоёр улсын хооронд байгуулагдсан хамгийн чухал гэрээ байсныг онцолж, Трампын тогтоосон тарифын улмаас энэ гэрээ дуусгавар боллоо хэмээн франц хэлээр хэлсэн байна.

Марк Карни ирэх сарын сүүлээр явагдах парламентын сонгуулийн сурталчилгааны ажлаар Квебек мужид очих ёстой байсан аяллаа цуцалж, Трампын тарифын эсрэг худалдааны холбогдолтой асуудлуудыг шийдвэрлэхээр ийнхүү Оттава хотноо сайд нартай зөвлөлдөх уулзалт зохион байгуулжээ.

Хэвлэлийн бага хурлын үеэр Марк Карни мөн АНУ-ын Ерөнхийлөгчийн албанаас түүнтэй холбогдож, ойрын өдрүүдэд Д.Трамптай утсаар холбогдож ярилцах тов тогтоосон болохыг мэдээллээ.

Трампын засаг захиргааны зүгээс Канадын ган, хөнгөнцагаан болон зарим бараа бүтээгдэхүүний импортод 25%-ийн тариф ногдуулаад байсан бол Канадын зүгээс хариу арга хэмжээ авч, АНУ-ын импортын бараа, бүтээгдэхүүнд 42 тэрбум ам.доллартай тэнцэх хэмжээний тариф ногдуулчхаад байгаа юм.

Канадын сөрөг хүчний Консерватив намын тэргүүн Пьер Пуивре Трампын энэ долоо хоногт тогтоогоод байгаа автомашины импортын 25%-ийн тарифыг “шударга бус” гэж тодорхойлсон бол Шинэ ардчилсан намын дарга Жагмит Сингх АНУ-ын тарифыг “хамгийн ойрын түншээсээ урвасан үйлдэл” гээд, Трампыг ямар ч шалтгаангүйгээр Канад улсын эсрэг хууль бус худалдааны дайн эхлүүллээ хэмээн буруушаасан байна.

Энэ үеэр мөн АНУ-ын ган, хөнгөнцагааны импортод ногдуулсан тарифын асуудлаар Канад улс Дэлхийн худалдааны байгууллагад гомдол гаргаад байна. ДХБ-ын зүгээс пүрэв гарагт хийсэн мэдэгдэлдээ импортын ган, хөнгөнцагаанд нэмж 25%-ийн тариф тогтоосон явдал нь ДХБ-ын дүрэмд нийцэхгүй хэмээн Канад улс гомдол мэдүүлж, маргаанаа шийдвэрлэх хүсэлт гаргасныг мэдээлжээ.

Харин АНУ-ын Ерөнхийлөгч Д.Трамп өөрийн тогтоосон ган, хөнгөнцагаан болон автомашины импортын тарифын нэмэгдлээ огт өөрчлөхгүй гэсэн байр суурин дээрээ бат зогссоор байгаа билээ.