Өнгөрсөн долоо хоногийн баасан гарагт Мьянмар улсын төвийн нутагт 7.7 магнитудын хүчтэй газар хөдөлсний улмаас амь үрэгдсэн хүмүүсийн тоо 1700-д хүрсэн талаар ням гарагт тус улсын Төрийн захиргааны зөвлөлөөс албан ёсоор мэдэгдсэн байна. Дээрх мэдэгдэлд мөн 3400 хүн бэртэж гэмтэн, 300 орчим хүн сураггүй болоод байгааг мэдээлжээ.

Баасан гарагийн маш хүчтэй газар хөдлөлтөд Мьянмар улсын нийслэл Нейпьидо болон улсдаа хэмжээгээрээ хоёрт ордог Мандэлэй хотууд өртөж, хамгийн их хохирлыг амсаад байгаагаас гадна мөн хөрш зэргэлдээх Тайланд улс нэрвэгдсэн бөгөөд хоёр улсад гамшгийн дараах эрж хайх, аврах ажиллагаа үргэлжилсээр байгаа ч барилгын нурангин доороос амьд үлдэх боломж 72 цаг байдаг тул даваа гарагийн байдлаар сураггүй болсон иргэдийг амьдаар нь олох боломж улам бүр багассаар байгаа ажээ.

Цаг хугацаатай уралдаж байгаа, нурангид дарагдсан хүмүүсийг аврах ажиллагаанд кран, экскаватор зэрэг томоохон машин техник, олон мянган хүн хүчийг оролцуулан үргэлжлүүлсээр байна. Түүнчлэн ням гарагт Хятадын тэргүүлсэн олон улсын аврах багийнхан Мьянмар улсын газар хөдлөлтөд өртсөн бүсэд очиж ажиллахаар замдаа гарсан талаар БНХАУ-ын Гамшиг зохицуулалтын яамны зүгээс мэдэгджээ.

Тайландын эрх баригчдын мэдэгдсэнээр тус улсад газар хөдлөлтийн улмаас наад зах нь 11 хүн амь үрэгдэж, 70 гаруй хүн сураггүй болоод байгаа гэжээ. Тайландын нийслэл Бангкок хотод баригдаж байсан өндөр барилга газар хөдлөлтийн улмаас нурсан бөгөөд барилгын нурж байгааг харуулсан бичлэг нийгмийн сүлжээнд тархсан.

Тэгвэл тэрхүү 33 давхар өндөр барилга нь Тайландын засгийн газрын харьяа аудитын албыг байршуулах зорилгоор Тайландын томоохон барилгын компани болон Хятадын төрийн өмчит компанид харьяалагддаг барилгын компанийн хамтран 2020 онд эхлүүлсэн барилгын төсөл байсан бөгөөд Тайландын засгийн газраас тус барилгын нурсан шалтгааныг шалгаж, долоо хоногийн дотор олж тогтоох тусгай хороог  байгуулахаар болсноо мэдэгдсэн байна.

Баасан гарагийн 7.7 магнитудын хүчтэй газар хөдлөлтийн дараах олон тооны жижиг чичиргээнүүд мэдэгдсээр байгаа ба АНУ-ын Геологийн судалгааны албанаас ням гарагт 5 магнитудын хүчтэй газар хөдлөлт мөн тухайн хэсэгт болсныг мэдээлсэн байна.

2021 онд цэргийн эргэлт хийж, төрийн эрхийг гартаа авсан цэргийнхэн болон ардчиллыг дэмжигч хүчнийхний хооронд ширүүн байлдаан үргэлжилж байгаа бүсүүдэд газар хөдөлсөн бөгөөд Үндэсний эв нэгдлийн засгийн газраас бямба гарагт гаргасан мэдэгдэлдээ аврах ажиллагаанд анхаарал хандуулахын тулд байлдаанаа 2 долоо хоногийн хугацаанд зогсоож байгаагаа мэдэгдэж, олон улсын тусламжийн байгууллагуудтай хамтарч ажиллах хүсэлтэй байгаагаа илэрхийлжээ.