Сирийн ерөнхийлөгчийн үүргийг гүйцэтгэгч Ахмед аль Шараа өнгөрсөн бямба гарагт ард түмэндээ хандан тус улсын шинэ засгийн газар байгуулагдсаныг зарлаж, шинэ засгийн газрын бүтэц бүрэлдэхүүнийг танилцуулжээ. Тэрээр Сирийн шинэ засгийн газрыг “өөрчлөлт шинэчлэлт, бүтээн байгуулалтын засгийн газар” хэмээн нэрлэж тодорхойлсон байна.

Ахмед аль Шараа мэдэгдэлдээ “Манай улс сайн сайхан ирээдүйд чиглэсэн түүхийн цоо шинэ эрин үеийг эхлүүлэх замдаа орж байна. Бид улс үндэстэн, ард түмнийхээ ашиг сонирхлын тусын тулд хүчтэй, тогтвортой төр засгийг байгуулж эхлэж байгаа гэдгийг миний бие Сирийн ард түмэнд батлан хэлж байна” гэжээ.  

Мөн тэрээр Сири улсын шинэ засгийн газрын үйл ажиллагаа ил тод, нээлттэй, авлигаас ангид байх болно гэдгийг нэмж хэлсэн байна.

Сирийн түр засгийн газрын гадаад хэргийн сайд Асаад аль Шайбани, батлан хамгаалахын сайд Мурхаф Абу Касра нар шинэ засгийн газарт дээрх албан тушаалаа хадгалж үлдсэн байна. Сирийн шинэ засгийн газарт эмэгтэй сайд багтсан нь онцлог байлаа. Шинэ засгийн газрын бүтэц бүрэлдэхүүнд багтсан цорын ганц эмэгтэй болох Хинд Кабаватыг нийгэм, хөдөлмөрийн сайдаар томилжээ. Бусад томилгоонуудын хувьд өмнө нь Сирийн Ерөнхий тагнуулын албыг удирдаж байсан Анас Хассан Хаттаб дотоод хэргийн сайдаар, Мазар аль Вайс хуульзүйн сайдаар, Нидал аль Шаар сангийн сайдаар, Мохаммед аль Башир эрчим хүчний сайдаар, Мусаб Наззал аль Али эрүүл мэндийн сайдаар тус тус томилогджээ.

Эх сурвалжуудын мэдээлж байгаагаар Сирийн шинэ засгийн газрын кабинетэд нийт 23 сайд багтаж байгаа бөгөөд ерөнхийлөгчийн үүргийг гүйцэтгэгч Ахмед аль Шараа засгийн газрыг тэргүүлэхээр болсон байна. Шинэ засгийн газрыг танилцуулах арга хэмжээ Сирийн ерөнхийлөгчийн ордонд зохиогджээ.