УИХ-ын чуулганаар 2024-2028 оны засгийн газрын хөгжлийн хөтөлбөрийн 2024 оны гүйцэтгэлийг хэлэлцэж байна. Хэлэлцүүлгийн явцад засгийн газар хөтөлбөр төлөвлөгөөгөө зөв төлөвлөж чаддаггүй. Буруу төлөвлөснөө ч дүгнэж мэддэггүй тухай асуудал яригдаад байна. Энэ тухай парламентын шинэ гишүүдийн төлөөлөл О.Номинчимэгтэй ярилцлаа.
-ЗГ ажлаа төлөвлөж мэддэггүй, төлөвлөж чадаагүй ажлаа буцаагаад буруу дүгнэдэг тухай яригдаж байна. Та энэ асуудалд ямар байр суурьтай байна вэ?
-5 жилийн төлөвлөгөө энэ жил дуусаж байгаа. Цаасан дээр бичсэн зүйлс бодит амьдрал дээр хэрхэн хэрэгжиж байна вэ гэдэг нь УИХ-ын гишүүдийн хувьд асуулт дагуулсан сэдвүүдийн 1 болж байна. Г.Лувсанжамц гишүүн хэлсэн дээ. Бид төлөвлөж чадахгүй, хэмжиж чадахгүй бол удирдаж чадахгүй ээ гэж. Ийм байдалд үнэхээр орсон байна. Олон цаас, олон тайлан, аудитын дүгнэлт орж ирж байгаа. Гэхдээ хэмжих нэгж нь тодорхой биш учраас юу болж байгаа нь болоод юу болохгүй байгаа ч нь ч ялгагдахгүй дутуу ажил болж таарч байна. Үр дүнд суурилсан хяналт шалгалт биш арга хэмжээнд суурилсан хяналт шалгалт явуулсан байна лээ. Аль аль нь холилдсон явж ирснээ 67 хувь гээд гаргаад ирсэн нь сууриар нь асуудлыг харах ёстой болжээ гэдэг нөхцөл рүү түлхэж байна. Үр дүнд суурилсан арга хэмжээнийхээ төлөвлөлтийг яаж хийх юм? Яаж ойлгомжтой болгох вэ? Гэдэгт анхаарахгүй бол эцсийн дүн 67 юу, 77 юу эсвэл 34 хувь байна уу гэхээсээ илүү 4 жилийн хугацаанд үр дүнтэй ажил хийсэн эсэхийг нотлох нарийн тоо гарч ирэхгүй байна гэсэн үг л дээ.
-Та Засгийн газрыг хир ажиллаж байгаа гэж харж байна вэ?
-Үйл ажиллагааны хөтөлбөрийн биелэлтийг харсан. Энд тодорхой хэсэгт нь л төлөвлөж ажиллахаар зорьсон байна лээ. Үүнд Мега төслүүдээ хөдөлгөх, экспортоо нэмэгдүүлэх зэрэг ихэвчлэн эдийн засгийн шинжтэй төслүүд багтсан байгаа юм. Энэ ажлуудын тухайд тодорхой арга хэмжээ авч ахиц гарсан харагдсан. Харин нөгөө талд үйл ажиллагааны төлөвлөгөө хөтөлбөрт багтсан хэр нь хэрэгжихгүй байгаа, үлдээж орхисон эсвэл хийх цаг хугацаагаа хойшлуулсан ажлууд бас байна. Бидний харж байгаагаар хүнд хөрөнгө оруулалт хийх, боловсрол, эрүүл мэнд зэрэг хүний суурь хэрэгцээг хэрхэн шийдэх талаарх ажил бүхэлдээ орхигдсон нь анхаарал татлаа. Ялангуяа чуулганаар хэлэлцэгдсэн 2024 оны хөтөлбөрийн биелэлтэд хүний суурь хэрэгцээний асуудлуудыг хэрхэн шийдвэрлэх талаар дорвитой үр дүн гарахгүй нь тодорхой байна. Тэгэхээр цаашид 2028 он хүртэлх хөгжлийн төлөвлөгөөнд зарим арга хэмжээ яагаад хоцроод байгаад анхаарал хандуулж, яагаад энэ ажлаа эхлэх болоогүй гэж хойшлуулсныг тодорхой болгох учиртай. 2-рт 2026 оны жилийн төлөвлөгөөнд ямар ажил руу гол гол фокус аа чиглүүлэхэд УИХ анхаарч ЗГ-аас шаардах хэрэгтэй нь харагдаж байна.
-Буруу төлөвлөж, буруу хэмжсэн, эцэстээ буруу дүгнэсэн асуудал яригдлаа. Цаашид ийм байдлаар төр засгийн ажил явах боломжтой юу? Ямар гарц байна вэ?
-Засгийн газраас төлөвлөх дүгнэхэд чиглэсэн систем нэвтрүүлнэ гэж тайлбарласан. Үүнийг нэвтрүүлээд ороод ирэхээр нь үр дүнг нь ахин ярилцах хэрэгтэй байх. Бид засгийн газрын хийж байгаа ажлыг шууд үгүйсгээд байж болохгүй шүү дээ. 2026 оны төлөвлөгөөгөө оруулж ирэхэд нь шалгуур үзүүлэлт, төлөвлөгөөг нь хараад ахиад хэлэлцүүлэг өрнөх байх. Нөгөө талд зөвхөн хараад суугаад байж болохгүй. Зөвхөн засгийн газрын үүрэг биш. УИХ ч анхаарч ажиллах учиртай. Монгол улсын алсын хараатай бодлого чиглэлээ уялдуулахад бид анхаарч ажиллах шаардлагатай байгаа. Энэ ажилд ажлын хэсэг их хурлаас томилогдоно. Төрийн ажлаа зөв төлөвлөж, зөв хэмждэг болох тал дээр УИХ ч гэсэн анхаарах нь ээ гэж дүгнэж болно.
-Мэдээлэл өгсөнд баярлалаа