Их Британийн нийслэл Лондон хотноо хууль бус цагаачдын урсгалыг зохицуулах асуудлаарх олон улсын чуулган даваа гарагт нээгдээд байна.

Хоёр өдөр үргэлжлэх энэхүү олон улсын чуулганд АНУ, БНХАУ, Франц гэх зэрэг дэлхийн 40 улс орон оролцож байгаагаас гадна мөн Интерпол, Курдистаны удирдагчид, Meta, X, TikTok зэрэг олон улсын байгууллага, компани аж ахуй нэгжүүд оролцож байна.

Иргэд нь өндөр хөгжилтэй улс орнууд руу олноороо цагаачладаг Вьетнам, Албани, Ирак зэрэг улс орны төлөөлөгчид ч мөн Лондон хотын Ланкастерын ордонд зохиогдож байгаа чуулганд хүрэлцэн ирээд байна.

Их Британийн ерөнхий сайд Кир Стармер чуулганыг нээж хэлсэн үгэндээ “улс орнуудын дотоод улс төрийн зөрчил, хуваагдлаас шалтгаалж хүн ард олноороо хүний наймааны золиос болж, улмаар улс үндэстнүүдийн хооронд зөрчилдөөн ч үүсэх аюул байгааг” анхааруулжээ.

Хууль бус цагаачлалын асуудлыг олон улсын түвшинд ийнхүү чуулж ярилцаж байгаа нь бараг анхны гэж хэлж болох үйл явдал бөгөөд чуулганыг зохион байгуулагч Их Британи улсын засгийн газраас чуулганы явцад үр дүнтэй санал, санаачлагууд гарна гэдэгт итгэж байгаагаа онцоллоо.

2025 он гарснаас хойш 6000 гаруй цагаач Их Британид далай тэнгисээр дамжин орж ирсэн нь шинэ дээд амжилтыг тогтоосон байна.

Чуулганы үеэр хууль бус цагаачдын урсгалыг зогсоох болон мөн жилд ойролцоогоор 10 тэрбум ам.доллар эргэлддэг хүний наймааны гэмт хэрэгтэй тэмцэх асуудлыг голчлон хэлэлцэж байна.

Энэхүү чуулганыг зохион байгуулахаас өмнө мөн Их Британийн засгийн газраас хууль бус цагаачдын урсгал, хүний наймааны гэмт хэргийн эсрэг тэмцэх зорилгоор хилийн хамгаалалт, хилийн аюулгүй байдлыг бэхжүүлэх үүднээс 30 сая фунт стерлингийн санхүүжилтийг олгож; хил гаалийн аюулгүй байдал, цагаачдын асуудал, гадаад ажилчдын асуудлыг зохицуулах хууль эрхзүйн зохицуулалтыг өөрчилж шинэчлэх; хүн хулгайлах гэмт хэргүүд дээр ажиллах албан хаагчдын чадварыг нэмэгдүүлэх зорилгоор прокурорын албанд 3 сая фунт стерлингийг нэмэлтээр төсөвлөх; мөн өнгөрсөн оны 7-р сараас хойш Их Британи улсад оршин суух эрхгүй 24 мянга гаруй цагаачдыг нутаг буцаах арга хэмжээг авсан байна.

Түүнчлэн Иракийн Курдистаны бүс нутагт байрлах хүн хулгайлах гэмт хэргийн сүлжээг уг үндсээр нь устгахад дэмжлэг үзүүлэх үүднээс Их Британи улс 1 сая фунт стерлингийн санхүүжилт олгож, хүн хулгайлах гэмт хэргээс урьдчилан сэргийлж анхааруулах зорилгоор Вьетнамын нийгмийн сүлжээний Zalo аппликейшнтэй хамтран сурталчилгааны кампанит ажлыг эхлүүлээд байгаа ажээ.