УИХ-ын чуулганаар АТГ-ын дарга З.Дашдавааг улираан томилох асуудлыг хэлэлцэж байна. Хэлэлцүүлгийн явцаас …
УИХ-ын гишүүдийн зүгээс З.Дашдаваагаар удирдуулсан АТГ-ын өнгөрсөн хугацаанд хэр сайн ажилласан тухай байр сууриа илэрхийлж байна. Энэ хүрээнд Ерөнхий сайд З.Дашдавааг эргүүлэн томилж байгаа талаараа мэдээлэл өглөө.
УИХ-ын гишүүн Л.Мөнхбаясгалан:
– Хэн нэгэн сайд аль 1 компаниас хандив авчхаад засгийн газар нь тухайн компанийн хууль бус үйлдлийг илрүүлээд УИХ руу өргөн барьж байгаа үед хандив авсан компанийн талд үйлчилбэл танай харьяалалд хамаарах хэрэг мөн үү? Энэ хууль зөрчих үү?
АТГ-ын дарга З.Дашдаваа:
-Асуудлыг шалгаж байж хариулах боломжтой асуулт байна аа.
УИХ-ын гишүүн Л.Мөнхбаясгалан:
-Ерөнхий сайдаас асууя. Засгийн газрыг авлигатай хийх тэмцэлд итгэж бид танай засгийн газрыг дэмжсэн. Таны Энержи ресурсээс Ухаа худгийн ордыг засгийн газрын тэмдэглэлээр хууль бусаар авсан гэж мэдэгдсэн асуудлаа яаралтай УИХ-д оруулж ирээч ээ. Тэмцлээсээ ухрахгүй байх гэж 6 жил ажилласан АТГ-ын даргыг оруулж ирсэн байх гэж найдаж байна. Зарим сайд нарын чинь үйлдэл хэрээс хэтэрч байгаа шүү. З.Дашдаваа даргын томилгоог дэмжье.
Монгол улсын Ерөнхий сайд Л.Оюун-Эрдэнэ:
– Авлига албан тушаалын хэргүүд шүүхийн түвшинд шийдэгдэхгүй байна гэсэн асуудал яригдаж байгаатай санал нэг байна. Гэхдээ авлигын асуудал яригдаж байгааг дэвшил гэж харж байгаа. 3-4 жилийн өмнөөс л ярьж эхэлж байна шүү дээ. Өмнө нь огт ярьдаггүй байсан. Байгалийн баялгийн тэгш бус хуваарилалтын асуудлыг хуулийн хүрээнд засаж залруулна. Авлигатай хийх тэмцлээсээ ухрахгүй. Хийгээд эхэлсэн ажлаа үргэлжлүүлэхийн тулд ч З.Дашдаваа даргыг үргэлжлүүлэн ажиллуулахаар шийдэж шийдсэн.
УИХ-ын гишүүн Х.Ганхуяг:
– Нэр дэвшигчийг дэмжиж байна. Авлигалын индексээр хүмүүс их баалж байна. Энэ индекс төрийн эдийн засагт эдлэх хэмжээнээс хамаардаг л даа. Өнөөдрийн байдлаар 350 мянган хүн төрд болоод төрийн үйлчилгээний байгууллагуудад ажиллаж байна. Ийм тохиолдолд авлигал буурах үндэслэл ерөөсөө байхгүй л дээ. 2,5 их наяд төгрөгийн хөрөнгийг хураасан гэдэг мэдээлэл сонслоо. Хөрөнгө хураана гэдэг юмыг Хууль зүйн сайд яриад байна. Сайн ойлгохгүй байх юм.
АТГ-ын дарга З.Дашдаваа
– Монгол улсын эрүүгийн хуульд үндэслэлгүй хөрөнгөжсөн гэдэг асуудал бий. Нийтийн албан тушаалтны үндэслэлгүй хөрөнгөжсөн асуудлыг манай байгууллага харьяалан шалгаж байна. О.Алтангэрэл сайдын өргөн барьж байгаа хуулийн төслийг хуулийн байгууллагууд бүгдээрээ үзэж санал бодлоо илэрхийлэх учиртай. Шүүхийн шийдвэр гарч байж бусдын хөрөнгө хураах асуудал яригдана. Манай байгууллага энэ асуудлыг шийдээд ажиллаж байгаа учраас хуулийн төслийг бол дэмжихгүй байна. 1986 оны Эрүүгийн хуулиар Эд хөрөнгө хураах заалт байсан. 2015 оны Эрүүгийн хуульд бол гэмт хэргийн улмаас үүссэн хохирлыг төлүүлж байгаа.
УИХ-ын дарга Д.Амарбаясгалан:
-Бид өнөөдөр АТГ-ын даргын томилгоог ярьж байгаа болохоос ажилтай нь танилцаагүй шүү.
АТГ-ын дарга З.Дашдаваа:
-АТГ-ын 5 дахь дарга. Бүрэн эрхийнхээ хугацааг дуустал ажиллаж байгаа анхны хүн болж байна. Би дараагийн 6 жилд хүнтэй гэхээсээ илүү тогтолцоотой тэмцэх төлөвлөгөөтэй байгаа
Спикер хэлэлцэх асуудлыг тодруулж гишүүдэд сануулсан ч гишүүдийн АТГ-ын даргын ажлын тухай асуулт асуухаа зогсоосонгүй. Хэлэлцүүлэг өрнөсөөр байна.